УИХ-ын гишүүн өөрийн биеэр санад хураалтад оролцох хуультай. Хэрэв ирцэд бүртгүүлээд санал хураалт явагдах үед гараад явчихсан бол түүний саналыг дэмжээгүйд тооцдог. Гэтэл өчигдрийн Төсвийн байнгын хорооны хурал дээр өөрөө байхгүй ч цаасан дээр “дэмжсэн” гэж бичээд гарын үсгээ зурчихвал санал хураалтад оролцож болдог гэдгийг УИХ-ын гишүүн Б.Болор харууллаа.
Түүний энэ үйлдлийг УИХ-ын гишүүн Ч.Хүрэлбаатар ихэд буруутгаж, хууль зөрчсөн үйл хэмээн үзэж байгаа цахим хуудсаар дамжуулан илэрхийллээ. Тэрээр “өнөөдөр болсон Төсвийн Байнгын хорооны хурал дээр өөрөө байхгүй ч цаасан дээр бичээд өгсөн саналыг ДЭМЖСЭН гэдгээр тооцож илт хууль зөрчлөө. Гарын үсгээрээ санал өгдөг моод энэ УИХ-д дэлгэрч яваандаа мессежээр ч санал өгдөг болох юм байна л даа” гэв. Мөн Б.Болор гишүүнд хандан “гарын үсгээрээ санал өгдөг хууль Монголд байхгүй шүү. Та энэ гарын үсгээрээ Өрийн удирдлагын тухай хууль, 2015-2017 оны Төсвийн хүрээний мэдэгдэл зэрэг 3 хуулинд санал өгсөн. УИХ-ын гишүүн хэлэлцэгдэж байгаа асуудалд хариуцлагатай хандаж буруу зөвийг чихээрээ сонсож байж саналаа өгөх нь УИХ-ыг хариуцлагатай болгодог юм аа гэдгийг зөвлөе. Өөрийгөө зөвтгөхийг битгий оролд” гэж мэдэгдлээ.
Өчигдрийн Төсвийн Байнгын хорооны хурлаар Төсвийн хүрээний мэдэгдэл болон Төсвийн тодотголын төслийн хоёрдугаар хэлэлцлүүлгийг хийсэн юм.
Ами
Оллоо.мн