Бай шагнал, бэл бэнчин, зангаргаараа өрсөлддөг нэг бүлэг хүмүүс бий боллоо. Тэднийг нутгийн зөвлөлийнхөн гэнэ. Жилийн бүрийн наадмаар аймаг, сумаасаа төрсөн улсын цолтонд олон өрөө байр, автомашин, сүрэг адуу гээд л өгөхгүй зүйл байхгүй. Хамгийн гол нь нутгийн зөвлөл гэдэг нэрийг л гаргах ёстой.
Тэгвэл нутгийн зөвлөлийн зангарга Үндэсний их баяр наадмаас халиад шинэ жилийн арга хэмжээ рүү шилжсэн байна. Тодруулбал, саяхан Дундговь аймгийн нутгийн зөвлөлийн “Алтан угалз” шинэ жилийн цэнгүүн болж. Энэ цэнгүүний үеэр нутгийнхаа нэрийг өндөрт өргөж яваа хэмээн Ардын жүжигчин, Хөдөлмөрийн баатар Г.Хайдав гуайд Дундговь аймгийн нутгийн зөвлөлийн дарга, УИХ-ын гишүүн Б.Наранхүү УНТ 0688 улсын дугаартай “Ланд круйзер 200” маркийн автомашин бэлэглэж, зангаргадсан байна.
Г.Хайдав гуай саяхныг хүртэл өөрийн гэсэн орох оромжгүй явсан. Харин “Монгол тулгатны 100 эрхэм” нэвтрүүлэгт орсны дараа “Агь” ХХК-аас “Содон” хороололд нэг өрөө байр захиалах эрхийг гардуулан өгч байсан билээ. Энэ үед нутгийн зөвлөлийнхөн хаагуур ч байсан юм... Бүү мэд...
Тэгсэн шинэ жилийн цэнгүүнээр гэнэт гарч ирээд л автомашин бэлэглэж “тэнэгтэв”. Нутгийн зөвлөл ч үнэхээр баян юм аа. Гэхдээ хүнээ олсонгүй бэлэг юм аа л гэж харагдлаа. Г.Хайдав гуай Ланд 200 унаад хаачих ч юм билээ дээ. Түүний оронд 21 дүгээр хороолол дахь байрыг нь хотын төв рүү болгоод өгсөн бол ч ... Эсвэл хэд хэдэн "Хорлоо эмээ"-д тусалж болох л байлаа. Үнэндээ Хорлоо эмээ ч гэсэн Дундговь нутгийн хүн шүү дээ. Даанч иймэрхүү асуудалд хөрөнгө зарцуулахаар нутгийн зөвлөлийнхөнд дэндүү жулддаг байх л даа.
За даа тэгээд энэ нутгийн зөвлөл гэгч байгууллага нэр нь л гарч байвал машин байна уу маруужин байна уу хамаагүй байдаг бололтой.
Ами
Olloo.mn
Olloo.mn