“Хүн бүхэн цаг хугацаагаар амьдралынхаа эхлэл төгсгөлийг хэмжиж, цаг хугацаагаар аз жаргал, гуниг зовлон, баяр хөөрөө дурсан санаж байдаг. Та энэ цаг мөчид хэн бэ, таны үзэл бодол, таны тухай мэдэж болох бүх зүйлийг багтаасан “100 асуулт 100 хариулт” нэвтрүүлэг эхэлж байна”. Энэ бол “MGLRADIO.COM”, MGLRADIO FM 102.1 долгионы хөтлөгч, редактор Х.Доржпаламын бэлтгэн хүргэдэг “100 асуулт, 100 хариулт” нэвтрүүлгийн эхлэл. Манай сонины редакци энэхүү нэвтрүүлэгт оролцсон хүмүүсийн сонирхолтой ярилцлагуудыг албан ёсны зөвшөөрөлтэйгээр уншигчиддаа хүргэж эхлээд байгаа билээ. Тэгвэл энэ удаагийн дугаартаа Зууны манлай эстрадын дуучин, Монгол Улсын Гавъяат жүжигчин, поп хатагтай Б.Сарантуяагийн “100 асуулт 100 хариулт” нэвтрүүлэгт өгсөн ярилцлагыг хүргэж байна.
-Та өөрийгөө товч танилцуулаач. Өндөр, жин, цусны бүлэг гээд л?
-Та өөрийгөө товч танилцуулаач. Өндөр, жин, цусны бүлэг гээд л?
-Батмөнхийн Сарантуяа, 42 настай. Цусны бүлгээ мэддэггүй. Биеийн өндөр 166, 75 кг.
-Шашин шүтлэгийн хувьд?
-Буддаг биширдэг, хүндэлдэг. Мөн бөөгийн шашинтай.
-Та гэр бүлээ танилцуулаач?
-Би өөрийн зургаан настай охин Хулан, 15 настай хүү Эрхэмбилэгтэй гурвуулаа амьдардаг.
-Таны хэлэх дуртай үг?
-Санаа сайн бол заяа сайн гэж хэлэх дуртай.
-Таны сонирхол болон хобби юу вэ?
-Аялах дуртай, сонирхол гэвэл хувцас дизайн. Мөн түүх сонирхдог. Хобби бол сайхан хүмүүсийн талаархи дурсамжийг цуглуулах дуртай.
-Таны дуртай болон дургүй хоол?
-Хамгийн дуртай хоол бол хүрэн манжингийн шөл /борщ/, дургүй хоол будаатай хуурга.
-Бүр багадаа таны хүсч, мөрөөдөж байсан мэргэжил?
-Бага байхаасаа хүсч мөрөөдөж байсан мэргэжлээ сонгосондоо баяртай байдаг.
-Согтууруулах ундааг юу гэж боддог вэ?
-Тунг нь тааруулж чадвал ундааны дээж.
-Та өөрийг ямар зан чанартай хүн гэж дүгнэх вэ?
-Нохой жилтэй учраас нэг талаас хувиа хичээмтгий юм шиг санагддаг байх, хүмүүст. Нөгөө талаасаа их цайлган, шударга, үнэнч. Гэхдээ хэтэрхий шударга зан маань миний амьдралд саад болдог. Би хэрвээ жаахан нууцлагдмал, хэлэх гэсэн зүйлээ дутуу үлдээдэг байсан бол илүү их амжилтад хүрэх байсан байх.
-Тэгвэл ойр дотныхон чинь таныг ямар зан чанартай гэж дүгнэдэг вэ?
-Шулуухан, муухан эр хүнээс дээр, хэлэх гэсэн үгээ хэлчихдэг. Зэвүүнээр бол хоншоортой гэж хэлдэг ш дээ.
-Таны хамгийн дуртай спорт?
-Агаарын теннис, усан спорт. Байнга хичээллэнэ гэвэл фитнесст дуртай, гүйх их дуртай. Автобусанд яарах, хүнээс зугтаах, уул руу өгсөх зэрэг гүйлт хүнд их хэрэгтэй.
-Энэ нийгэмд стресс гэж нэг зүйл байна. Хэрвээ та стресст орвол ямар аргаар тайлдаг вэ?
-Надад тааламжгүй зүйл байдаггүй гэвэл хүмүүс намайг худалч гэх байх л даа. Ерөнхийдөө стресст ордоггүй, хамгийн том стресс гэвэл цагтаа амжих, юмнаас хоцрох вий гэсэн, төлөвлөсөн зүйлдээ амжихгүй байх вий гэж л стресстдэг дээ. Өөр стресс байхгүй. Бүр машин явдаггүй өдөр мартаад машинтайгаа явж байхад нэг ч цагдаа зогсоохгүй болохоор нь гайхаад шоконд орсон.
-Та өөрөө өөртөө хэзээ хамгийн их таалагддаг вэ?
-Би тоглолтын өмнө нүүрээ будчихсан, үс гэзгээ янзалчихсан, бүх бэлтгэл хангагдчихсан үед болон тоглолтын дараах хөлөрчихсөн Сараад дуртай. Бүх ажлынхаа ард гарчихсан, бас утсаар аальгүйтэж ярьдаг ялдамхан Сараад дуртай.
-Цаг хугацааг ухраадаг машин байсан бол та хэдэн онд очих байсан бэ?
-Би буцаад нэгдүгээр ангидаа ороод, Хөгжим бүжгийн сургуульд орох байсан.
-Таныг сургуульд сурч байх үеийн хамгийн мартагдашгүй дурсамж?
-Намайг сургуульд сурч байхад пионерийн удирдагч маань их муухай ааштай эмэгтэй байсан юм. Би орос сургуульд сурч байсан юм чинь. Тэгээд маш их загнадаг. Тэр үед нь би баатарчуудтай ажилладаг ахлагч байсан юм. Тэгсэн тэр хүн намайг аймшигтай загнахаар нь би уйлсан. Тухайн үед чинь баахан орос баатарчуудыг монгол охин удирдахаар нөгөөдүүл нь үгэнд орохгүй байх тохиолдол их гарна. Тэгээд орос удирдагч эмэгтэй намайг загнаад би их уйлсан чинь нөгөө баатарчууд маань нэг их гэмшиж, намайг өрөвдөөд бүгдээрээ үгэнд ордог болоод жагсаад, тэр жагсаалын уралдаанд байр эзэлсэн юм. Энэ үеэс л удирдагч болох замаа нээсэн юм болов уу, дараа нь би сургуулийн идэвхтэн сурагч болоод дундаж сурдаг байсан бол хичээлдээ хандах хандлага маань өөрчлөгдөж, эрс сайжирсан. Шугам жагсаал болгон дээр галын улаан дөлтэй баярын бичиг авдаг, түүнийгээ авах гэж тэсэн ядан хүлээдэг болсон дурсамж маань хэзээ ч мартагддаггүй юм.
-Маргаашийг урьдчилан хар гэвэл та юу харахыг хүсч байна?
-Маш их амжилттай ажлын өдөр. Хүмүүс амралт их мөрөөддөг, харин би амралт мөрөөддөггүй. Маш их ажил хийж, тэр ажлынхаа үр дүнг харахыг хүсдэг. Амраад байхаар амьдралын утга учир маань алдагддаг учраас би үргэлж эрч хүчтэй, ажилтай байх дуртай. Тэгэхээр ажлаар дүүрсэн, бүтээлч өдөр байгаасай гэж хүсч байна.
-Та унтахынхаа өмнө юуны тухай бодвол илүү сайхан амарч чадаж байна?
-Би унтахынхаа өмнө юу ч боддоггүй. Бүх зүйлийг тас мартдаг. Хамгийн гол нь би унтах орчноо сайн бүрдүүлдэг. Дэр их сайхан байх ёстой. Хөөрдөггүй, будааны дэр байвал илүү тохиромжтой. Өрөөндөө агаар маш сайн оруулсан, бас их цэвэрхэн байх ёстой. Үсээ, амаа, биеэ маш сайн цэвэрлэх, ор маш цэвэрхэн байх, орны даавуу, хөнжил гудас маш цэвэрхэн байх ёстой. Би сансартай харилцах хөлөг онгоц гэж ор хөнжлөө боддог. Унтах гэдэг нь өөрийгөө цэнэглэж байгаа, цэнэг авч байгаа учраас би тэр цэнэгийг маш сайхнаар, их гоёор авна гэж боддог.
-Нэг өдрийн төлөвлөсөн ажлаа хийж дуусгачихаад хамгийн түрүүнд юу хийхийг хүсч байна?
-Би ийм ажил бүтээсэн гэж ээждээ, эсвэл ойр дотны хүндээ тайлан тавих дуртай. Ажлын хамт олондоо ийм ажил бүтээсэнд баяр хүргэе, good job гэж хэлэх дуртай.
-Та өдрийн хэдэн цагийг хамгийн их хүлээдэг вэ?
-Сэрэх цагаа буюу өглөөг хамгийн их хүлээдэг. Би сэрэх цагаа төлөвлөдөг, сэрүүлэг тавьж, хүлээдэг.
-Өөрийгөө толинд хараад юу гэж боддог вэ?
-Ямар хөөрхөн юм бэ гэж л боддог.
-Таны хамгийн их аз жаргалтай байсан үе?
-Элэг бүтэн байхдаа л би их аз жаргалтай байсан. Дүү маань, аав минь амьд сэрүүн байх үед би аз жаргалтай байсан. Ер нь тэнэг байхдаа л аз жаргалтай байдаг юм биш үү. Ухаан нэмэгдэх тусам санаа зовох зүйл гарч, аз жаргал багасдаг юм шиг санагддаг. Дээр үеийн, гэнэн харцтай зургуудаа харахаар аргагүй л жаргалтай байж гэж боддог. Одоо ч гэсэн жаргалтай боловч хүн жил ирэх тусам ухаан нэмж байдаг учраас урьд жилийнх нь байдал тэнэгдүү ч юм шиг, илүү аз жаргалтай байсан ч юм шиг санагддаг.
-Та нэг сард өөртөө зориулаад хэдэн төгрөг зарцуулдаг вэ?
-Өөртөө бол 2-3 сая төгрөг зарцуулдаг. Би их нарийн, өөртөө их бага мөнгө зарцуулж байна гэж боддог. Ажил хийж байгаа, авч байгаа цалинтайгаа харьцуулах юм бол маш бага. Энэ биеийг их муу шагнаж байгаа, тэгэхдээ жилдээ 20-30 сая төгрөг зарцуулж чадна. Гэхдээ үүнд унадаг унаа, эд хогшил биш. Зөвхөн өөрийнхөө гоо сайхан, мэдлэг, ертөнцийг мэдрэх мэдрэмж, баяр баясгалан, сэтгэл санааны байдлыг дэмжих үүднээс энэ мөнгийг зарцуулдаг.
-Та хамгийн анх уулзсан хүнээ хаанаас нь эхэлж хардаг вэ?
-Нүднээс нь хардаг. Мөн гарыг нь хардаг. Би уулзахаасаа өмнө нэг иймэрхүү хүн байгаа байх гэж төсөөлж очдог. Гэхдээ заримдаа төсөөлснөөс шал өөр хүн байхаар их гоё санагддаг.
-Хүмүүсийг татахдаа өөрийнхөө ямар зан чанарыг ашигладаг вэ?
-Эгэл жирийн байдлаараа, энгийн байхдаа л хүнийг их татдаг гэж хүмүүс ярьдаг юм билээ. Гаднаас нь харахад их ширүүн, ууртай юм шиг харагддаг гэнэ л дээ. Гэхдээ харилцаад, яриад эхлэхээр ийм энгийн байсан юм уу, хөөрхөн ааштай гэж хэлдэг. Нэг их муу юм санадаггүй, дотуур тамиртай биш илэн далангүй байдаг маань хүмүүст их таалагддаг юм шиг.
-Та бүх зүйл сайхан бүтсэн үед гэртээ амраад, зурагтаа үзээд хэр удаан хэвтэж чадах вэ?
-Цаг гаруй л хэвтэнэ дээ. Тэгээд л нуруу, бөөр өвдөөд, удаан хэвтэж чаддаггүй. Энэ дашрамд телевизүүдийг шүүмжлээд хэлэхэд танин мэдэхүйн, бидний насны эмэгтэйчүүдэд зориулсан нэвтрүүлгийг их цөөхөн хийдэг. Дандаа л кино гарч байдаг, бас дундаас нь үздэг болохоор ойлгодоггүй. Гэтэл дундаас нь үзсэн ч ойлгохоор нэвтрүүлэг хийгээсэй гэж боддог. Эсвэл сериал гаргах юм бол ойр ойрхон урьд нь болсон зүйлийг сануулж гаргахгүй бол дундуур нь маш их сурталчилгаа явдаг. ОХУ-ын телевизүүдэд нэг тийм зүйл байдаг шүү дээ. Үзэх юм байхгүй, дээрээс нь удаан хэвтэж чаддаггүй болохоор босно доо. Сая зуслан дээр байхад хийх зүйл олдохгүй, хэцүү байсан. Тэгээд одоо юу хийх вэ дээ. Ямар дарс уултай биш, утсаар ярилтай биш. Түүний оронд нэг оёдлын машин гаргаж тавиад гудсаа өнгөлөх ч юм уу, эсвэл даавуу индүүдэх ч юм уу. Ажил хийж байвал сэтгэл амардаг.
-Авлига, хээл хахууль гэж таныхаар юу вэ?
-Хүн хийх ёстой ажлаа хийснийхээ төлөө шан харамж авах, цалинтай ажил хийж байгаа мөртлөө илүү нэг хөдөлснийхөө төлөө түүнийхээ хөлсийг авах нөхцлийг авлига гэж хэлнэ. Би ямар ч авлигагүйгээр одоог хүртэл амьдарч байна. Зүгээр талархлаа илэрхийлж, бэлэг өгөх, зоог барихыг би авлига гэж үзэхгүй. Энэ бол хүний сэтгэлийн илэрхийлэл. Талархаж байгаагаа хүмүүс хэлсэн ч гэсэн ядаж зоог барихгүй, бүр нэг хов хоосон орох чинь эвгүй шүү дээ. Ерөнхийдөө би бас бэлэг өгөх их дуртай. Гэхдээ харсан хүн болгондоо өгөөд байна гэж байхгүй. Түүнийг бол тип /урамшуулал/ гэж ярьдаг шүү дээ. Үүнийг ялгаж, салгах хэрэгтэй.
-Та сэтгэл хөдлөлөө яаж илэрхийлдэг вэ?
-Уйлна, баярлаад уйлчихдаг. Би догдлох юм бол их цэцэн болдог. Хүнтэй хэрэлдэх юм бол үгээ маш сайн онож, ном хаялцана гэдэг шиг хэрэлдэнэ. Мөн хүнд сургаалийн үг хайрлах ч юм уу, сэтгэл хөдөлсөн үедээ заримдаа зурхайн ухаан руу хүртэл орж, заяа төөргийг нь хэлэх гээд байдаг.
-Хайртай хүндээ төдийлөн хэлж чаддаггүй ч хэлэхийг хүсдэг тэр үг?
-Үг хэлдэг л дээ, тэгэхдээ би үнсэхийг боддог. Хайртай хүнийхээ биед нь хүрэхийг, үнэрлэхийг боддог. Тэгээд дандаа үүсэж байх ёстой гэдэг үүднээс үргэлж үнсэхийг боддог.
-Та дурлалдаа шаналаад уйлж байв уу?
-Уйлж байсан. Дурлалаасаа татгалзсан үедээ уйлж байсан болохоос биш шаналж уйлж байгаагүй. Хүүхэд дуртай тоглоомоо авч чадахгүй уйлдаг шиг цамаан загнаж байгаад уйлж байсан тохиолдол бий.
-Хорвоогийн жамаар хүн бүхэн буцна. Тэр үед бурхантай тааралдахад, хоёр янзын зүйл хэллээ гэж бодъё. Нэгдүгээрт нь чи насаараа ажиллажээ, ямар азтай хүн бэ. Харин хоёрдугаарт чи насаараа ажиллажээ, ямар азгүй хүн бэ гэж. Хэрэв бурхан танд ингэж хэлбэл та алийг нь хэлээсэй гэж бодож байна?
-Ямар азтай хүн бэ гэж хэлэх байх. Бас та амарч чадахгүй л дээ, ажилласаар байх болно, магадгүй бурхны оронд ч гэсэн та ажиллах болно, өөрийнхөө үүргийг биелүүлэх гэж ирж байна гэж хэлэх байх.
-Таны хамгийн романтик гэж боддог дурлалын түүх?
-Хамгийн романтик дурлалын түүх бол хүүгийнхээ аав Болдхуягтай учирсан, танилцсан, сүүйт бүсгүй нь болох үеийн бөгж, бид хоёрын танилцах үеийн алтан гинж. Их сонин, яг арванхоёрдугаар сарын 26-нд надад тэр гинжийг бэлэглэж байсан. Их олон жилийн дараа хэдийгээр гэр бүл тусгаарласан ч гэсэн бие биеэ хүндэлдэг, хайртай хэвээрээ байдаг юм шиг санагддаг. Тэгсэн чинь би нэг удаа гинжийг нь ухаад гаргаад ирсэн. Бүр харлачихсан ч юм шиг, өнгө алдчихсан гундчихсан байхад нь угаагаад, өнгөлөөд тавьсан. Бас хүүдээ үзүүлсэн, ярьж өгсөн. Аав нь ээжид нь хайр сэтгэлээ илэрхийлж ийм гоё гинжин дээр Б+С=love гэж бичиж, арванхоёрдугаар сарын 26-нд бэлэглэсэн гэж ярьж байсан тэр өдөр бас арванхоёрдугаар сарын 26 байсан. Тэр их романтик байсан. Намайг эргүүлж байсан, хайр сэтгэлээ илчилж байсан хүмүүсийн дундаас тэр хамгийн их романтик байсан. Магадгүй миний хүү ч гэсэн найз бүсгүйгээ ийм сайхан романтик байдлаар эргүүлж, авч суух байх.
-Эсрэг хүйсийнхээ хүнтэй бүр дотно найз байж болох болов уу. Таны бодлоор?
-Болно гэж боддог.
-Ижил хүйстнүүдийн талаар та юу гэж боддог вэ?
-Ойлгохыг хичээдэг. Манайхан жигшдэг, дургүйцдэг. Гэхдээ би хөхиүлэн дэмжихгүй. Байгалиас заяасан хувь тавилан байж болно. Бас бэлгийн амьдралд орохдоо алдаатай орсон байж болно. Тэгэхээр анхнаас нь хүүхдүүдийнхээ төлөвшил дээр анхаараасай гэж боддог. Мөн генетикийн алдаа байж ч болно шүү дээ. Хоёрдугаарт, ижил хүйстэн хос бие биедээ хайртай байж болно шүү дээ. Түүнийг нь бид мэдэхгүй. Би хэдийгээр өөрөө тийм харьцаанд орж үзээгүй хэрнээ ижил хүйстэн олон танил, найз бий л дээ. Би хувьдаа тэд нарыг их ойлгодог. Эрэгтэй тал нь буюу гей тал нь илүү үнэнч шударга байдаг болов уу гэж боддог. Нийгмийн дунд адлуулж байдаг хүмүүс хоорондоо нуун байж хайр сэтгэлтэй болж байгаа, байгалийн хуулийг зөрчиж байгаа нь хувь тавилан, үйлийн үр юм уу даа.
-Айл бүхэнд гэрэл зургийн цомог байдаг. Та гэрэл зургийн цомгоо хэзээ, хамгийн сүүлд үзсэн бэ?
-Би дандаа үздэг. Гэхдээ заримдаа үзэхээр гунигтай дурсамж сэдэрч, уйлмаар үе гардаг. Нулимс дуслуулмаар зураг их байдаг. Гэрэл зургийн цомгоо үзэх үеэр хүүхэд насны минь дурсамж эргээд ирдэг. Аз жаргалтай байсан тэр үеийн зургаа үзэж, хүүхдүүддээ бас тэр аз жаргалтай үеийн зургаа үзүүлдэг. Манай хүүхдүүд чинь бидэнтэй 18 нас хүртлээ амьдраад л, тусдаа гараад явах учраас энэ л хүүхэд насных нь дурсамжийг сайхнаар үлдээхийг зорьдог.
-Таны хүүхэд насны баатар хэн бэ?
-Салхи сөрөгчид, Скарлет миний баатар. Тэнгэр ниргэж байхад аянгын өөдөөс сөрөн зогсдог Скарлет бол миний баатар.
-Гэр бүлээс гадуурх харьцааг та юу гэж боддог вэ?
-Энэ бол өөрийгөө болоод гэр бүлээ мэхэлж байгаа хамгийн буруу зуршил. Нүгэл...
-Таны үзэх дуртай телевизийн нэвтрүүлэг?
-Nandia,s talk show.
-Таныг нэг өдөр эрэгтэй хүн бол гэвэл эрэгтэй хүнийх нь хувьд юу хийж үзэхийг хүсч байна?
-Би их романтик, халамжтай эр хүн болно. Нэг зэрэг маш олон бүсгүйг дурлуулна. Нэг өдөр олон эхнэр авах байх аа.
-Таны багын хоч?
-Том, монтгор хамартай байсан учраас Монтоошко л гэдэг байсан.
-Эмэгтэй хүний эрэгтэйгээсээ давуу байх зан чанар нь юу юм бол?
-Эмэгтэй хүний давуу талыг ашиглаж болно. Сул тал гэдгээрээ далимдуулж болно. Гоо үзэсгэлэнгээрээ татаж болно. Энэ бол том зэвсэг шүү.
-Хэрвээ та Монгол Улсын Ерөнхийлөгч байсан бол юу хийх вэ?
-Хамгийн түрүүнд хууль тогтоомжоо цэгцэлнэ. Улс орны аюулгүй байдал, агаар, хоол хүнснээс эхлээд цэгцэлнэ.
-Таны унших дуртай ном...?
- Шведийн зохиолч Астрид Линдгренийн “Дээвэр дээр суудаг Карлсон”, Жек Лондоны цуврал номуудыг орос хэл дээр унших дуртай.
-Таны очих дуртай газрууд?
-Аавын нутаг, Төв аймгийн Баян сум, Цайдамд очих дуртай.
-Таны амьдралдаа хамгийн их ичиж байсан тохиолдол?
-Би оюутан байхдаа савхин юм шиг мөртлөө даавуун материалтай өмд өмсдөг байсан. Биеийн хувьд их мяраалаг, гуяараа махлаг байсан болохоор нөгөө өмд маань үрэгдээд элэгдчихдэг байсан. Тэгээд гуяны хэсгээ их нөхөж очдог, баахан нөхөөстэй байсан. Тэгээд нэг удаа дуулаад сууж байсан чинь яаманд оркестрийн маш олон хөгжимчин сууж байхдаа нөгөө өмдний маань нөхөөсийг харчихсан. Тэр үед их ичсэн. Мөн чармай нүцгэн явж байна гэж зүүдлэхдээ их ичдэг.
-Болзсон газраа, цагтаа ирээгүй найзаа хэр удаан хүлээх вэ?
-Цаг, хоёр цаг хүлээж чадна.
-Ямар ч хүн байхгүй, маш том цэнгэлдэх хүрээлэнгийн голд ганцаараа байвал та юу гэж хашгирах вэ?
-Маш чангаар хашгирна.
-Та амласандаа ер нь хүрдэг үү?
-Хүрэх гэж хичээнэ, хүрнэ. Хүрэхийн төлөө хөлөө хугалах дайны юм болно доо. Ядаж байхад аягүй бэлэн амтай, амлачихсан болохоор түүнийгээ биелүүлэх гэж хөлөө хугалах шахан гүйнэ дээ.
-Таны хувцасны стиль. Мөн хамгийн олон жил өмссөн хувцас бий юу?
-Миний хамгийн дуртай стиль бол Рокко, Бракко. Буржгар үстэй, шадар гурван цэргийн хувцасных шиг мөрөндөө сагсгар зүүлттэй гэх мэтчилэн. Ер нь хувцасны стиль өөрчлөгдөж, хээнцэр тал руугаа болсон. Эрхэмсэг байдал бол одоо миний нийгэмд эзлэх байр суурь, нас намбатай холбоотой. Костюм, пиджак байгаа. Энэ хослолыг бараг 22 жил шахам өмсч байгаа шүү. 1997 оноос тоглолтод өмсч байсан хувцас бий. Одоо хүртэл би өмсдөг.
-Таны хамгийн дуртай баяр?
-Шинэ жил, цагаан сар, наадам, төрсөн өдөр.
-Та компьютер дээр суугаад хамгийн түрүүнд орж үздэг гурван вэбсайтыг нэрлэнэ үү?
-Yahoo и-мэйл, фэйсбүүк, news.mn сайтыг үздэг.
-Дэлхийн ирээдүйн хөгжил таныхаар ямар байх бол?
-Улам л хуучин газрын гүн рүүгээ эргэж ирэх байх. Хөгжиж байгаа технологи ч гэсэн хүн рүүгээ чиглэсэн байх болов уу.
-Танд кинонд тоглох урилга их ирдэг байх. Гэхдээ та ямар дүр бүтээхийг хүсч байна?
-Хааяа урилга ирдэг. Киноных нь зохиол таалагдахгүй, би чадахгүй болов уу гэж бодоод татгалзаж байсан. Гэхдээ тоглодог байж гэж бодсон шүү. Хэрэв тоглосон бол би адтай, сэргэлэн, бизнес эмэгтэйн дүрийг бүтээж чадах байсан байх. Үлгэрийн кино байвал би Цасан хатанд тоглож чадах байсан.
-Таныг шүүмжлэхэд хэр хүлээж авдаг вэ?
-Ер нь их дургүй, эмзэг хүлээж авна. Уйлна, гомдоно, тунина, айлгана. Би бол өөрийгөө их өмөөрнө. Сүүлийн үед бол би их сонсдог болсон. Гэхдээ долоо хоногийн дараа хүлээж авна.
-Гудамжинд зогсоо зайгүй хүмүүс холхиж байна. Гэтэл тэнд 100 төгрөг хэвтэж байна. Та тэр 100 төгрөгийг яах вэ?
-“Хүүе 100 төгрөг байна ш дээ” гээд л шараа болохгүйн тулд чанга хэлээд авна.
-Та нар, сар хоёрын алинд нь илүү дуртай вэ?
-Хоёуланд нь дуртай, наргүйгээр амьдарч болохгүй. Би өглөөний мандаж байгаа наранд залбирдаг. Хүүхдүүдээ залбируулж, хүслийг нь хэлүүлдэг. Сар бас хүнийг их бодлогоширонгуй болгодог. Миний нэр сартай холбоотой учраас би их дуртай байдаг. Миний id хүртэл moon гэдэг нэртэй.
-Аав, ээжийн чинь хэлсэн үгнээс хамгийн их хоногшиж үлдсэн нь?
-Эдээр гоёхоос эрдмээр гоё, ажил хийвэл дуустал, давс хийтэл уустал гэж хэлдэг байсан.
-Та амьдралдаа тохиолдсон хэцүү үеэ хэрхэн даван туулсан бэ?
-Мундаг даван туулсан гэж боддог. Хэзээ ч амиа хорлохгүй, сэтгэл санаагаар унахгүй, амьдралын төлөө явна.
-Улс төр гэж таны бодлоор?
-Янхандалт гэж үздэг ш дээ.
-Таны хамгийн их даган дуурайж, бишрэн шүтдэг алдартан?
-Эрэгтэй дуучдаас Канадын Брайн Адамс гэдэг дуучны бүтээлд их дуртай. Тэр зэвүүн этгээд үг хэллэгтэй, хөгжмийг зохиодог. ОХУ-аас Алла Пугачёвагийн бүтээлд дуртай. Түүний этгээд байдалд нь дуртай. Түүгээр зогсохгүй маш олон дуучин байна. Нандинцэцэг гуай, Норовбанзад гуай, Цогзолмаа гуай гээд шүтэх хүн олон байна.
-Хэрвээ та үл үзэгдэгч болчихвол юу харахыг хүсч байна?
-Хүний ертөнцөд дээд тэнгэрээс бууж ирсэн хэрэгтэй, хэрэггүй шаарнуудыг устгах юмсан гэж боддог.
-Та хэр их нээлттэй хүн бэ?
-Нээлттэй хүн.
-Хэрвээ та кино зохиолч байсан бол ямар кино зохиол бичих вэ?
-Би энэ бумбын эрин, оюун санааны эринд зориулсан оньсого таавар мэт кино хийх байсан.
-Та хүсэл биелүүлэх бирдтэй таарлаа гэж бодъё. Таны нэг л хүслийг биелүүлье гэвэл?
-Намайг эргүүлж хүн болгож төрүүлээч гэж л хүснэ.
-Та хэр шударга хүн бэ?
-75 хувь.
-Гар утасны чинь дэлгэц дээр ямар зураг байдаг вэ?
-Өөрчилдөг, янз бүрийн зураг тавьдаг. Байгалийн зураг их тавьдаг байснаа сүүлдээ өөрийнхөө зургийг их тавьдаг болсон. Учир нь утсаар миний ажил их бүтдэг учраас өөрийнхөө тэр энергитэй гоё газар авахуулсан зургаа тавьдаг.
-Таны гар утасны ая ямар байдаг вэ?
-Хамгийн сүүлийн үед моданд орж, олны таашаалд нийцэж байгаа хүний дууг тавих хэрэгтэй гэж боддог.
-Таны хамгийн дуртай үсний засалт?
-Жазз, буржгар, хайш яайш юм шиг, хэзээ ч янзалж болдог үс.
-Та уурлахдаа ямар зан гаргадаг вэ?
-Дуу өндөрсч эхэлдэг. Тэгээд аманцар болоод эхэлбэл аймаар уурлаж байна гэсэн үг.
-Та өөрөө өөртөө хэзээ хамгийн итгэлтэй байдаг вэ?
-Хүүхдүүдтэйгээ байхдаа л маш их итгэлтэй байдаг.
-Таныг одоогийнхоо ажил мэргэжлийг соль гэвэл?
-Дизайнераар солино.
-Таны хамгийн сайн мэддэг гадаад хэл?
-Орос хэл...
-Хүмүүсийн танд хэлдэг урмын үгнээс хамгийн сайхан нь?
-Ер бусын гайхамшигтай, зүүд зэрэглээ мэт, үлгэрийн мэт гэж ярьдаг хүнд их дуртай.
-Таны өрсөлдөгч?
-Цаг хугацаа миний өрсөлдөгч. Цаг хугацаа алдвал би нухуулна. Цаг хугацаа бол найраагүй өрсөлдөгч.
-Та хөгширсөн хойноо хаана, яаж амьдарна гэж боддог вэ?
-Маш үзэсгэлэнтэй газарт, өөрийнхөө эдлэнд амьдарна. Жек Лондоны “Том байшингийн жижигхэн эзэгтэй” гэдэг зохиол дээр гардаг шиг. Хүн хүрээгүй ширэнгэн ойд, өөртөө үнэнч үйлчлэхээр тогооч, маш сайн тусалдаг, хамт вино хувааж уудаг, үнэнч сувилагч байж таарна. Би нэг их хүүхдүүдтэйгээ хамт амьдарна гэж боддоггүй. Хэдийгээр хүнгүй амьдарч чадахгүй ч гэсэн. Тэгээд хүлээж авдаг өдөртэй. “Өнөөдөр Сараа эмээ хүлээж авахгүй” гэж хэлэхээр. Тэгээд тэр сайхан том байшиндаа өөрийнхөө удам угсааны хүмүүсийн хөргийг мундаг зураачдаар зуруулж, галарей байгуулаад, хүүхдүүд маань сүйт бүсгүй, сүйт хархүүгээ дагуулж ирэхдээ танилцуулдаг байхаар тохижуулна. Энэ бол Монголын язгууртны угсааг залгуулах суурийг тавих хүсэлтэй байна.
-Танд оройтсон ч гэсэн хамгийн их сурахыг хүсч буй зүйл?
-Хэл, мөн хөгжим тоглож сурахыг хүсч байна.
-Та төрсөн өдрөө хэрхэн тэмдэглэдэг вэ?
-Дандаа л гоё тэмдэглэдэг. Би төрсөндөө их баярладаг. Би амьд яваадаа их баярладаг учраас төрсөн тэр л өдрийг их гоё байлгаж, онцлон тэмдэглэх учиртай гэж үздэг. Би гэдэг хүн амьд байгаа учраас олон хүнийг баярлуулах ёстой. Хүмүүст баяр баясгалан авчирах ёстой гэж боддог.
-Лото бөглөж байгаад гэнэтхэн асар их мөнгө хожчихвол та яах вэ?
-Бүгдийг нь буяны байгууллагад хандивлана. Би ер нь тийм мөнгөнд дургүй. Гэнэт баяжих аминд халтай, гэнэт идэх гэдсэнд халтай. Тэгээд ч би сугалаанд итгэдэггүй.
-Та одоогоор бэлгэнд авахыг хүс байгаа зүйл?
-Машин. Би дандаа л өөртөө авах юм. Хүмүүс машин бэлэглээд л байх юм. Тэгэхээр машин бэлгэнд авч үзэх юмсан.
-Мөнгө гэж таныхаар юу вэ?
-Хэрэгцээг хэрэгжүүлэх хөдөлгөх хүч.
-Та эх орноо ямар байгаасай гэж боддог вэ?
-Маш цэвэрхэн байгаасай. Оюун санааны хувьд, экологийн хувьд маш цэвэрхэн байгаасай. Бусад нь аяндаа болно доо.
-Энэ нийгэмд хамгийн түрүүнд өөрчлөх ёстой зүйл?
-Худлаа ярихаа болиосой.
-Та ер нь хэр их инээдэг вэ?
-Цагийн өмнө инээсэн.
-Та хэд наслахыг хүсч байна?
-80, 90 магадгүй 100 ч хүрч болно. Надад нас бол хамаагүй. Маш удаан л амьдрахыг хүсч байна.
-Та ямар эмээ болох бол?
-Сайхан эмээ болно. Олон юм ярьдаггүй. 100 хувь дэлхийн хэмжээний, сайн хадам ээж болно шүү.
-Маргааш дэлхий сөнөнө гэвэл та амжиж юу хийх вэ?
-Амжиж нэг мессэж үлдээх л хэрэгтэй дээ. Харин ямар маягаар үлдээх вэ гэсээр байгаад л дуусах юм шиг байна даа.
-Хайр гэж таныхаар?
-Хайр гэдэг бол маш сайхан эерэг энергийн хуримтлал.
-Тэгвэл амьдрал гэж...?
-Амьдрал бол тэмцэл.
-Та өөрийгөө амьтантай зүйрлүүлбэл?
-Үнэг байж болно. Муурны төрлийн л амьтан байх байх.
-Та одоогийнхоо амьдралд сэтгэл ханамж хэдэн хувь байна?
-115 хувь. Яагаад гэвэл би өөрийн дотоод итгэл үнэмшил, зөн совиндоо итгэж өдий хүртэл амьдарч байгаа. Хэрвээ та надаас бөө юу, зөнч үү гэж асуусан бол би тийм гэж хариулах байлаа. Би өдий хүртэл ийм сайхан амжилттай яваа маань өөрийнхөө зөн совингоор, далд мэдрэмжээр залж яваатай холбоотой. Тиймдээ ч би одоогийнхоо амьдралд сэтгэл ханамж хэдэн хувь байна гэсэн таны асуултад 115 гэж хариулсан юм.
-Яг одоо танд төрж байгаа сэтгэгдэл?
-Миний хамаг зүйлийг авчихсан юм шиг санагдаад, нэг л сэтгэл хоосроод байх юм.
Монголын мэдээ
Буулгасан Э.Туул
Буулгасан Э.Туул