Нийслэлийн иргэдийн төлөөлөгчдийн хурлын 45 төлөөлөгч улирал бүр 10 сая төгрөгийн мөнгөн урамшуулал авдаг тухай мэдээлэл цацагдаж, тэр хэрээр иргэдээс шүүмжлэл хүртээд байсан билээ. Гэвч энэхүү урамшууллыг төлөөлөгчид өөртөө бус сонгогдсон тойрогтоо зарцуулдаг хэмээн хамгаалсаар байсан юм.
Иргэдийн хувьд нэлээд шүүмжлэлтэй байсан мөн эдийн засгийн хямралтай, улс орны төсөв санхүү хомсодсон энэ үед Нийслэлийн 2015 оны төсөвт “ИТХ-ын төлөөлөгчдийн урамшууллыг хасаж, хэмнэлт хийх”-ээр оруулсан ч төлөөлөгчид зөвшөөрөөгүй учраас цааш үргэлжлүүлэн олгохоор болжээ. Өөрөөр хэлбэл иргэдийн хурлын төлөөлөгчид урамшуулал авахаасаа “ичсэнгүй”.
НИТХ-ын нэг төлөөлөгч улиралд 10 сая, жилд 40 сая, сонгуульт дөрвөн жилийн хугацаанд 160 сая төгрөг урамшуулал хэлбэрээр авах юм. Үүнийг 45 төлөөлөгчид үржүүлбэл 7.2 тэрбум төгрөг гарч байна. Энэ хөрөнгө тойрог бүртээ цэвэр шударгаар зарцуулагдаасай.
Ами
Olloo.mn