С.Хорлоо эмээг ч танихгүй хүн ховор болоо биз ээ. Гэхдээ тэрээр хэвлэлээр бичигдэхээс ч өмнө олондоо танигдсан хүн байсан юм. Түүнийг С.Хорлоо эмээ гэхээс илүү “Цайны эмээ” гэдгээр нь Бөмбөгөр худалдааны төвийнхөн сайн мэднэ.
Өдөр бүр тогтсон цагтаа Дэнжийн мянгын цагаан байрнаас хоёр халуун сав цай авч ирж “Бөмбөгөр”-ийн худалдаачдад үйлчилсээр олон арван жилийг өнгөрөөж байна. Өдгөө 90 насыг зооглож байгаа энэ буурай үр ачаа эрхлүүлээд налайж суух ёстойсон. Гэвч амьдралын эрхээр өдөртөө 2-4 халуун сав цай худалдаж олсон хэдэн төгрөгөөрөө амьдралаа залгуулж бас болоогүй зарим хэдийг нь цааш нь хийж амьдарсаар өнөөдрийг хүрчээ. 90 настай хөгшин мөнгө хадгалж яадаг юм болоо гэж бодогдох байх. Би ч тэгэж бодож байснаа нуумааргүй байна. Харин тэрээр хадгалсан мөнгөө хүүдээ зориулдаг аж.
Хүү нь эхнэр хүүхэдтэйгээ тусдаа амьдардаг ч сэтгэцийн өвчтэй учраас ээждээ туслах нь битгий хэл өнөөдөр ээжийнхээ тусламжийг аваад амьдарч байна.
С.Хорлоо эмээ “Хүмүүс намайг асрамжийн газар аваачна л гэдэг юм. Муу өвчтэй хүүгээсээ холдоно гэхээр санаанд багтахгүй юм аа. Би хүүгээ сард ядаж нэг эргээд байна шүү дээ. Үхтэл үр харам гэж, барааг нь харж байгаад өнхөрье дөө, эмээ нь” хэмээн тэрээр нүдэндээ нулимстай нэг биш удаа сэтгэлээ уудалж байсан юм.
Үнэхээр л үхтэл үр харам гэгчээр өөрөө нар гэрэлтэж, салхи нэвтэрсэн амбаарт амьдарч байж хүүгийнхээ эмчилгээнд хэмээн өдөр бүр шантралгүйгээр цай зарсаар байгаа С.Хорлоо гуайгаар өөрийн эрхгүй бахархах сэтгэл төрнө. /Өмнө нь амьдарч байсан хашаа байшингаа зарж хүүгийнхээ эмчилгээнд зарцуулсан ч тусыг эс олжээ./
Тиймээс л түүнд туслах хүсэлтэй залуус олон болсон байна. Харин тэдгээр залуусыг “Монгол тусгал залуусын нэгдэл” ТББ нэгтгэн ямартай ч С.Хорлоо эмээгийн амьдарч буй амбаарыг нь сольж, байшинтай болгож өгөхөөр зорьсон юм.
Өнгөрөгч хугацаанд “Монгол тусгал залуусын нэгдэл” ТББ-ын залуус хандивын аян явуулж, 12 дугаар сарын 5-ны өдрийн байдлаар нийт 6.5 сая төгрөг цугласан байна. Энэ мөнгийг нь байшин барихад зарцуулсан. Гэхдээ бүгдийг бус. Сайхан сэтгэлт залуус, ААН-үүдийн буянаар 6 сая төгрөгийн үнэтэй канад технологиор баригдсан байшинг тал үнээр нь авч, дулаалга, хашааны төмөр хаалга, модон тавилга гээд бүхий л зүйлсийг нь үнэ төлбөргүй, эсвэл хямдруулсан үнээр авч С.Хорлоо эмээгийн байшинг тохижуулж, 10 хоногт төлөвлөсөн ажлаа 7 хоногийн дотор дуусгасан юм. Харин үлдсэн мөнгийг нь эмээгийн нэр дээр данс нээж, хадгалсан байна.
Ингээд С.Хорлоо эмээг өнгөрөгч лхагва гаригт шинэ байшинд нь авч ирэх ёстой байсан юм. Гэвч пүрэв гариг болгон хойшлогдсон талаар “Монгол тусгал залуусын нэгдэл” ТББ-ын залуус “С.Хорлоо эмээ лхагва гаригийг муу өдөр байна. Пүрэв гаригт очъё. Тэр өдөр ч эмчилгээ дуусна гэж хэлсэн” хэмээн тайлбарлав. Тиймээс ч эмээгийн хэлснээр пүрэв гаригийн морин цаг шинэ гэрт нь авч ирсэн байна.
Энэ цагт С.Хорлоо эмээг угтан авахаар “Монгол тусгал залуусын нэгдэл” ТББ залуус болон хүсэл зорилго нэгтэй олон залуус ирсэн байлаа. Өчигдөрхөн хүйтэн зутруу амьдарч байсан эмээ өнөөдөр тохилог, дулаахан байшинтай болсноо хараад нулимс унагаж, залууст баярласнаа хэлж, ерөөл айлдсаар гэртээ оров.
Харин “Монгол тусгал залуусын нэгдэл” ТББ залуусын зүгээс шинэ байшингийн жаврыг үргээж, морин хуур, уртын дууг эгшиглүүлж гэнэтийн бэлэг барилаа.
Энэ үеэр С.Хорлоо эмээ “Эмээ нь үргэлж Төрийн сүлдэндээ мөргөн явдаг. Төрийн сүлд түмний минь буян түшэж ийм сайхан орон гэртээ боллоо. Одоо надад өөр хүсэх зүйл алга. Хүүхдүүдийн минь ажил үйлс үргэлж бүтэмжтэй байг. Эрүүл энх байж олон хүнийг баярлуулж яваарай. Хүний төлөө явсан хүний үйлс үргэлж бүтдэг юм аа” гэсэн ерөөлийг айлдав.
Нэгэн буурайг орон гэртээ болгож чадсандаа залуус өөрсдөөрөө бахархаж байлаа. Үнэхээр ч тэднээр бахархамаар. Тиймээс ч ерөөл магтаал тэдэнд багадахгүй.
Залуус “Эмээ өөрийнхөө төлөө бус ганц хүүгийнхээ төлөө хөдөлмөрлөж яваа нь биднийг түүнд туслах хамгийн том шалтгаан болсон” гэж хэлцгээж байна. Залуусын бахархам үйл явдалд ая дуу нэмэхээр “Voice” хамтлагийн дуучин, соёлын тэргүүний ажилтан С.Баттулга хүрэлцэн иржээ. Тэрээр залуусын хийж хэрэгжүүлсэн ажлыг өндрөөр үнэлж, ээжийн тухай дууг залуустай хамт дуулж, С.Хорлоо эмээгийн төрсөн говь нутгийн тухай дуугаар эгшигэн цэнхэр хадаг өргөлөө.
С.Хорлоо эмээд туслах аянд 350 гаруй залуус оролцож, тусламжийн гараа сунгасан юм. “Монгол тусгал залуусын нэгдэл” ТББ-ын залуус үүний дараа хүүхдүүдэд туслана хэмээн хэлж байна. “ ... Бид эх орныхоо тал бүрээс нэгэн сэтгэлээр цугласан Монголын залуусын нэгдэл. Бидний Тусгал эх оронд минь тулгамдсан асуудлууд руу чиглэх болно” гэсэн эрхэм уриатай эдгээр залууст цаашдын их үйлсэд нь өндрөөс өндөр амжилтыг хүсье.
Дэнжийн мянгын цагаан байр ... Энд С.Хорлоо эмээтэй адил түвшин амьдарч буй цөөнгүй хүн байна. зуны амбаар, нүүрсний саравч мэт зүйлд амьдарч өдөр хоногийн өнгөрүүлсээр. Бас иймэрхүү оромжийг түрээслүүлэг хүмүүсч байдаг бололтой юм. Амьдралын нөхцөл үүнээс хүнд олон ч иргэд бий. Гэвч албан тасалгааны цонхоор тэд ямар харагдах биш дээ.
Ами
Olloo.mn
Olloo.mn