Өөрсдөө ёс зүйгүй байж л төрийн ордноос ёс зүй хайх юм. Энэ хүмүүс. Тэнд чинь хүмүүс л байгаа юм хойно ёс зүйн алдаа гарах л байлгүй дээ.
Манай Портууныг "архи уучаад хурал үймүүллээ..." гээд байсан. Телевизийн цаанаас лав юу чиг л үнэртээгүй шд. Зээ дарга л худлаа шоудсан юм биш үү. Яагаав Шүүхийн Ерөнхий зөвлөлийн даргыг “Чи шүүгчдийн цалинг нэмэх эрхгүй хүн шүү” гээд л загнаад байсан өөрөө л Шүүхийн Ерөнхий зөвлөл бол бүрэн эрхтэй байгууллага гээд баталсан хүн байсан биз дээ. Тэрэн шиг манай Портуунаар гал тахиулж, төрийн ёслол хүндэтгэлийн арга хэмжээг хийлгэж хийлгэж байснаа сайдын суудлаас буунгуут нь “архи уусан байна, харьж унт” гэж ирээд л загнасан байгаа юм даа.
Царайлаг сайдтай болчихоор тэнгэр, уул, усаа аргадах шаардлагагүй болж байгаа юм байлгүй. Уг нь энэ хүн чинь уул усаа аргадсны хүчинд сүртэй нэртэй бондууд босч Монгол руу урссан гэдэг биз дээ.
Тэгэж ярьвал Түвшөөг Бээжинд аваргалж, Монгол Улс олимпийн анхны аваргаа өлгийдөн авах үед маш олон согтуучууд түмний өмнө гарч шившигээ тарьсан даа. Та нар санаж байна уу. Тэгэхээр хүн яагаад 100 татаж болдоггүй юм бэ. Төрийн түшээ болохоор дотроо халааж, сэтгэлээ засч болдоггүй юм уу.
Түүний оронд хүн зоддог хурандааг ярьж болно шд. Цаадах чинь өнөөдөр шадар сайд болоод явж байна. “Муу бацааныг ... би чинь цэргийн хүн ...” гэж ирээд л уурлаж байгаад тэр нэг юмыг шанаадаад унагана лээ. Үнэхээр мэргэжлийн цэргийн хүн гэдгээ зурагтын олон камерын өмнө өөрийгөө харуулсаан харуулсан. K1-ийн тулаан ч ийм хурдан болж дуусч байсныг мэдэхгүй юм байна. Тэгэхээр мэргэжлийн хүний өөдөөс хоёр хурууныхаа дундуур эрхий хуруугаа гозойлгосон нь буруудаад үлдэх шиг болно лээ.
За тэр хоёр хурууны дундуур эрхий хуруу гозойлгох бол төрийн түшээдээс эхлээд түмний нялх үрс хийж л байдаг үзэгдэл. Үүнд бас хариуцлага тооцож, ёс зүй яриад хэрэггүй шүү.
Түүний оронд гуя хаагаа олны өмнө дэлгээд нээв нэг сууж байдаг “монос” гишүүндээ л анхаарлаа хандуулаарай. Бенз машинаа гайхуулж, мини юбка өмсөөд л залуу охидоос дутахгүй салхи татуулж харагдана лээ. Архи тамхины хуулиа батлуулаад авахын тулд эрхэм гишүүдийн анхаарлыг татах далд зорилготой ч байсан байж мэдэх юм. Тэгэхээр ёс зүй ярихгүй байсан ч яадаг юм. Ямар +18 зураг цахим хуудсаар тараагаад “үнэхээр сайхан ...” гээд шүүрс алдаад байгаа биш дээ тээ. Төрийн түшээ хүн +18 зураг олон нийтэд тараах нь битгий хэл үзэх ч хориотой. Гэхдээ энэ нь ёс зүйн алдаа гээд туйлширч бас болохгүй юм аа. Дээх нь манай улс төрийн товчооны эрхэм дарга нарын заавал захиалах ёстой хэвлэлд “халуун хөнжил” ... мэтийн сонингууд ордог байсныг бодохоор Зоригоо гишүүний зураг тараах юу ч биш юм аа гэлтэй. Тэгээд ч эр хүн эм хүний гоо сайхны шүтэн бишэрч болдоггүй яачихсан хорвоо юм.
Эрүүл мэнд, амь насаа ард түмний төлөө хайрлан хамгаалах ёстой гэсээр байтал уул хадаар авирч, мотоцикл унаж өөрийгөө гэмтээгээд байгаа хүнийг тэгвэл яах юм. Ёс зүйгүй байна гэх үү. Би лав уулын спортын мастер байсан бол хэзээ ч бусдын төлөө төрийн ордонд өөрийгөө хадахгүй. Амралтын өдрөөр ууланд л явж байх байсан. Хүний эрх юм чинь дээ.
Төрийн түшээ гэхээр бүх юмаараа биднээс дээгүүр байх вээ. Бүгд л хүн юм чинь ёс зүйн алдаа гаргаж л таарна шүү дээ. Хангамж, цалин, эрх мэдэл гээд дээгүүр зүйл олон ч ядаж ёс зүйн алдаа гаргадгаараа бидэнтэйгээ эн зэрэгцээд явж байвал гоё биш үү. Би төрийн түшээтэйгээ эн зэрэгцлээ гээд л ярина шд.
Тэгээд л нэг л их сүрхий ёс зүйдэж ирээд л, хүнийг эвгүй байдалд оруулцгаагаад. Больчихоорой. Тийм л сүрхий юм бол тэр хуулийг нь олоод уншчих.
Монгол Улсын Их Хурлын гишүүний Ёс зүйн дүрмийн 2.1.5- д “Төрийн ордон болон Улсын Их Хурлын чуулганы хуралдааны танхимд биеэ зөв авч явж, холбогдох хууль тогтоомжийг сахин биелүүлэх”, 2.1.7-д “ёс зүйн хэм хэмжээг сахих талаар олон нийтэд үлгэр жишээ үзүүлэгч байх” гэж заасан байдаг. Харин 7.1-т “Энэ дүрмийн биелэлтэд Ёс зүйн дэд хороо хяналт тавин ажиллах бөгөөд уг дэд хорооны ажиллах журмыг тусгай дүрмээр тогтооно” гэсэн байдаг юм билээ. Өөрөөр хэлбэл бид тэдний шүүмжлээд хэрэг байхгүй. Тэднийг чинь ёс зүйн алдаа гаргавал шүүдэг, хариуцлага тооцуулдаг тусгайлсан “ЁС ЗҮЙН ДЭД ХОРОО” гэдэг нэр, эрх мэдэлтэй албан тушаалтнуудын хүртэл төрийн ордон байдаг. Тэд нар нь татвар төлөгчдийн мөнгөөр цалинждаг юм аа. Тэгэхээр бидний өмнөөс бухимдаж, ёс зүйн алдааг шүүгчид байхад бид эд эсээ үхүүлэх шаардлага байна уу.
Ами
Olloo.mn
Olloo.mn