Монголын боксын холбооны удирдах зөвлөл энэ сарын эхээр хуралдаж нэлээн хэдэн асуудлыг хэлэлцжээ. Уг хурлын шийдвэрээр эрэгтэйчүүдийн шигшээ багаас ОУХМ Х.Энхдэлгэрийн сонирхогчдын боксын тэмцээнд тоглох эрхийг хассан байна. Тэрбээр өөрийн насаа гурван насаар хасч, дүүгийнхээ нэрээр тэмцээнд оролцож байжээ. Х.Энхдэлгэр гэдэг түүний төрсөн дүү, харин өөрийнх нь жинхэнэ нэр Х.Энх-Амар гэнэ.

Мөн түүний дасгалжуулагчаар ажиллаж байсан "Алдар" спорт хорооны багш дасгалжуулагч А.Гантулгыг тэмцээнд оролцох эрхийг хоёр жилээр хассан байна. Х.Энх-Амар Инчёоны Азийн наадамд оролцохоор явахдаа Солонгосын хил гаалийнханд баригдсанаар түүнийг насаа нууж, тэмцээнд оролцдог нь батлагджээ.

Үүнээс гадна  Жэжүд болсон ДАШТ-д багийн дасгалжуулагчаа  үл хүндэтгэж, түүний ур чадварыг голон, асуудал үүсгэсэн гурван эмэгтэй тамирчнаа мөн л хасчээ.  Гэхдээ эдгээр тамирчид гэмээ ухаарч, уучлалт хүсвэл эргээд боксын рингэнд гарах боломж байгаа гэнэ.

Г.Уянга
olloo.mn