Хоёр дэд сайд, гурван Төрийн нарийн, МХЕГ-ын даргын томилгоог ''тодруулахад''...

Засгийн газрын өчигдрийн ээлжит хуралдаанаар хэд хэдэн томилгоо хийлээ. Даваа гарагт багаараа чөлөөлөгдсөн БОАЖЯ-ны удирдлагын баг бүтэн болов. Тодруулбал, уржигдар УИХ-ын намрын чуулганы сүүлийн өдөр БОАЖ-ын сайдаар ШӨХТГ-ын дарга Б.Бат-Эрдэнийг томилсон. Тэгвэл өчигдөр тус яамны дэд сайдаар нь Сангийн яамны Төсвийн хөрөнгө оруулалтын газрын дарга Г.Түвдэндоржийг томилов. Харин Төрийн нарийн бичгийн даргаар нь УИХ-ын Тамгын газрын дэд дарга Э.Баттулга очлоо.

Мөн өдөр Сангийн яамны Төрийн нарийн бичгийн дарга С.Наранцогт Эдийн засаг, хөгжлийн дэд сайд болсон юм. Харин Сангийн яамны Төсвийн бодлогын газрын дарга Ж.Ганбатыг тус яамны Төрийн нарийн бичгийн даргаар томиллоо.

Түүнчлэн ХЗДХЯ-ны Төрийн нарийн бичгийн дарга Б.Баасандоржийг МХЕГ-ын дарга болгож, оронд нь Хуулийн бодлогын газрын дарга П.Сайнзориг томилогдов.

Ийн өчигдөр Засгийн газар хоёр дэд сайд, гурван Төрийн нарийн бичгийн дарга, МХЕГ-ын даргыг шинээр томиллоо.

БОАЖ-ын дэд сайд Гантөмөрийн Түвдэндоржийн хувьд Нийслэлийн Нэгдүгээр дунд сургуулийг дүүргэж, 1998-2002 онд ХҮИС-ийг Олон улсын худалдаа, эдийн засагч мэргэжлээр төгссөн. 2002-2006 онд АНУ-ын Беркли коллежийг бизнесийн удирдлага мэргэжлээр төгсч, 2007-2016 онд хувийн хэвшилд ажилласан. 2017-2018 онд Сангийн яамны Нягтлан бодох бүртгэлийн бодлогын газрын дарга, 2018 оноос Сангийн яамны Төсвийн хөрөнгө оруулалтын газрын даргаар ажилласан.

Эдийн засаг, хөгжлийн дэд сайд Санжаагийн Наранцогт нь 1994 онд МУИС-н физик математикийн сургуулийг төгссөн. 2008 онд Сөүлийн Үндэсний их сургуульд доктор (PhD)  хамгаалсан. 2013, 2014 онуудад Харвардын Их Сургуульд Төрийн Санхүүгийн удирдлагаар мэргэжил дээшлүүлсэн. 1993-1994 онд Математикийн хүрээлэнд туслах ЭША, 1994-1997 онд Шинжлэх ухаан мэдээллийн төвд ахлах инженер, 1997-2000 онд Монголын нээлттэй нийгэм хүрээлэнд хөтөлбөрийн зохицуулагч, 2000-2003 онд Батлан хамгаалах яам, Монголын урлагын зөвлөл, "IC" ХХК зэрэг байгууллагуудад зөвлөхөөр ажилласан. 2003-2005 онд Сангийн яаманд мэргэжилтэн, Хэлтсийн дарга, 2008-2012 онд БСШУЯ-ны Санхүү, хөрөнгө оруулалтын газрын дарга, 2012-2015 онд Хөдөлмөрийн яамны Санхүү, сангийн бодлого төлөвлөлтийн газрын дарга, 2015-2017 онд Сангийн яамны Төрийн сангийн газрын дарга, 2017 оны хоёрдугаар сараас Сангийн яамны Төрийн нарийн бичгийн даргаар ажиллажээ.

Сангийн яамны Төрийн нарийн бичгийн дарга Жигжидийн Ганбат нь  тус яамны Төсвийн бодлогын газрын даргаар 2012 оны долдугаар сарын 18-нд томилогдож байв. Түүнээс хойш ажиллаж байгаа. Ажилдаа сайн нэгэн гэдгийг яамныхан нь, салбарынхан нь хэлдэг.

БОАЖЯ-ны Төрийн нарийн бичгийн дарга Эрхэмбаярын Баттулга 1998-2002 онд УБИС-ийн Байгалийн ухааны факультетыг газарзүйн багш-аялал жуулчлалын менежер мэргэжлээр төгссөн. Мөн сургуульдаа Газарзүйн шинжлэх ухааны магистрын зэрэг хамгаалсан. 2011-2012 онд Австрали улсын Жеймс Кукийн их сургуульд бизнесийн удирдлагын магистрын зэрэг хамгаалсан. 2002-2004 онд Засгийн газрын хэрэгжүүлэгч агентлаг Аялал жуулчлалын газарт мэргэжилтэн, 2004-2006 онд Зам, тээвэр, аялал жуулчлалын яаманд мэргэжилтэн, 2006-2008 онд тус яаманд газрын орлогч дарга, газрын даргаар ажилласан. 2008-2011 онд Байгаль орчин, аялал жуулчлалын яаманд газрын орлогч дарга, газрын даргаар ажилласан. 2013-2016 онд Нийслэлийн Засаг даргын хэрэгжүүлэгч агентлаг Аялал жуулчлалын газрын даргаар, 2016-2020 онд Нийслэлийн Засаг даргын хэрэгжүүлэгч агентлаг Байгаль орчны газрын даргаар ажилласан. 2020 оноос Улсын Их Хурлын Тамгын газрын дэд даргаар ажиллаж байжээ.

ХЗДХЯ-ны Төрийн нарийн бичгийн дарга Пүрэвжавын Сайнзориг салбартаа 10 гаруй жил ажиллаж байгаа. Олон арван хуулийн төсөл дээр ажилласан. Хуулийн бодлогын газрын даргаар 2016 оны наймдугаар сарын 3-нд томилогдож байв. МХЕГ-ын дарга Барсүрэнгийн Баасандорж нь МУИС-ийн Хууль зүйн сургууль, АНУ-ын Калифорнийн олон улсын их сургууль төгссөн. Эрх зүйч мэргэжилтэй, бизнесийн удирдлагын магистр зэрэгтэй.

2001 оноос УИХ-ын Тамгын газрын Ерөнхий нарийн бичгийн даргын туслах, Хуулийн хэлтсийн шинжээч, Хууль зүйн байнгын хороонд референт, зөвлөх, ахлах зөвлөх, Хууль зүйн яаманд газрын дарга, 2015 оноос УИХ-ын Хууль зүйн байнгын хорооны ахлах зөвлөхөөр ажиллаж байсан.

2018 оноос УБЕГ-ын даргаар ажиллаж байгаад 2021 оны долдугаар сарын 22-ны өдрийн Засгийн газрын хуралдаанаас ХЗДХЯ-ны Төрийн нарийн бичгийн даргаар томилогдсон юм.

Эх сурвалж: “Зууны мэдээ” сонин
Б.Очир

Бусдад түгээх
  • gplus

Сэтгэгдэл үлдээх

Уншигчдын бичсэн сэтгэгдэлд olloo.mn хариуцлага хүлээхгүй болно.
ХХЗХ-ны журмын дагуу зvй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зvйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 772-01100 утсаар хүлээн авна.

Сэтгэгдэлээ бичихХураах

тэмдэгтэнд багтааж бичнэ үү.
  • САЙХАН ЗАЛУУС БАЙНА. 2022-01-21 04:23:42
    САЙХАН САЙХАН ЗАЛУУЧУУД АЖИЛ АЛБАНД ТОХООН ТОМИЛОГДЖЭЭ_ УЛСДАА ТӨРДӨӨ АРД ОЛОНДОО ҮНЭНЧ ЗҮТГЭЦГЭЭХ БИЗ ЭЭ... АЛДАА ЭНДЛЭЭС ХОЛУУР БАЙХ БОЛТУГАЙ
  • зочин 2022-01-20 02:02:42
    зарим нэг хүмүүс төрийн албанд 6 хан жил ажиллсан байх юм энэ нь хуульд нийцэж байгаа болуу ер нь боловсон хүчин маш дутагдалтай болчихсон юмуу эсвэл нөгөө намд...