МҮЭ-ийн холбооны ерөнхийлөгчөөр томилогдоод хэдхэн хонож буй С.Эрдэнэбат ёстой л сэрчихгүй бол сайхан зүүдээ олон нийтэд сэжиг ажиггүй хэлж орхилоо. Тэрбээр “Цалин, хөлсийг 2025 он гэхэд хоёр дахинаас доошгүй хэмжээнд нэмэгдүүлэх зорилт тавьсан. Цаашлаад 2030-2040 он гэхэд Скандинавын орнуудын хэмжээнд хүргэнэ. Тухайн орнуудын дундаж цалин одоогийн тооцооллоор 10 орчим сая төгрөг байгаа. Үүнд үе шаттай хүргэхэд дөрвөн жилийн хугацаанд цалин хөлс, түүнтэй адилтгах иргэдийн орлогыг нэмэгдүүлэхэд холбогдох байгууллагуудтай нягт хамтарч, шахаж шаардаж ажиллана” гэсэн.
 
Үнэндээ түүний яриаг сонссон олон нийтийн хувьд цалин, хөлсийг нэмэгдүүлэх гэдэг хэсэг нь тун таатай боловч хэмжээ нь хэзээ ч биелэлээ олохгүй мөрөөдөл гэдгийг бататгаж орхив.
 
Энгийн жишээгээр хэлэхэд Монгол Улс тэртээ 1970-аад оноос метротой болох тухай яригдаж эхэлсэн байдаг. Ингээд ардчилал хөгжсөн гэх 2004, 2013, 2016, 2020 гээд хэдэн жил хичнээн байгууллагатай метроны асуудал хөндөж, бүр ТЭЗҮ-ийг нь хийлгэв дээ. Гэвч мөнөөх л авто замын түгжрэлдээ бухимдаж, нийтийн тээвэртээ чихэлдэж, шахалдан, хүйтэнд хөрч, халуунд халсаар л яваа.
 
Яг үүнтэй адил Монголчуудын ажлын цалин хөлс ч өсөлт нь маш удаан байгаа нь нийгэмд ядуурал нэмэгдэж, ажилгүйдлийн тоо нэмэгдэж байгаасаас харж болно.
 
Уг нь МҮЭ-ийн шинэ ерөнхийлөгч хөрсөндөө бууж, ядаж л эхлээд гишүүдийнхээ ажиллах орчин, эрх зүйн орчныг бүрдүүлэхэд өөрсдийн үүргээ 100 хувь биелүүлэх ёстой баймаар байна.
 
Тэгээд ч МҮЭ гэдэг худал амлаж, ярьж байгаад УИХ-ын гишүүн болох “сууриа цутгадаг газар” гэж ойлгосон бол том эндүүрэл шүү.