ИТХ-аас 162 орон тоо ''хэмнэв''

Засгийн газар шинэ сэргэлтийн бодлогын хүрээнд төрөөс иргэн, аж ахуйн нэгжид хийгддэг төлөвлөгөөт шалгалтыг 50 хувиар бууруулах, цахимжуулах, бодлогыг арванхоёрдугаар сард багтаан гаргах талаар хэлэлцлээ. Мөн ашигт малтмалын тусгай зөвшөөрлийн олголтын журмыг шинэчлэх, цахимжуулах өөрчлөлтийг хэлэлцэж шийдвэрлэлээ.

БҮТЭЦ, ОРОН ТООНЫ ШИНЭЧЛЭЛ ИРЭХ ОНЫ НЭГДҮГЭЭР САРЫН 1-НЭЭС ХЭРЭГЖИНЭ

Төрийн байгууллагын бүтээмжийг сайжруулах, чиг үүргийн давхардал, хийдлийг арилгах, бүтцийг цомхон, чадварлаг болгож иргэдэд үзүүлэх төрийн үйлчилгээний чанарыг сайжруулахын тулд аймаг, нийслэл, сум, дүүргийн иргэдийн Төлөөлөгчдийн Хурлын ажлын албаны болон аймаг, сумын Засаг даргын Тамгын газрын бүтэц, орон тооны хязгаарыг тогтоох тухай Засгийн газрын тогтоолыг баталлаа. Тодруулбал, НИТХ-ын ажлын албаны орон тооны хязгаарыг 35, дүүргийнх 8-21, аймгийн иргэдийн Төлөөлөгчдийн хурлын ажлын албаны орон тооны хязгаарыг 8-12, сумынх 3-4 байхаар, аймгийн Засаг даргын Тамгын газрын бүтэц, орон тооны хязгаарыг тогтоохдоо орон нутгийн онцлог, нутаг дэвсгэрийн хэмжээ, хүн амын тоо, эдийн засаг, үйлдвэрлэлийн цар хүрээнээс хамааруулан 34-46 хүртэл байхаар тогтоолоо. Хэлтэс, тасаг, агентлагийн чиг үүргийг давхардуулахгүйгээр оновчтой шийдвэр гаргах үүргийг аймгийн Засаг дарга нарт өгчээ. Энэ талаар ЗГХЭГ-ын дэд дарга У.Бямбасүрэн “Аймгийн ЗДТГ-ын бүтэц орон тоог тогтоох ажил ирэх оноос хэрэгжиж эхлэх Засаг захиргаа нутаг дэвсгэр түүний удирдлагын тухай хуулийн бэлтгэл ажлын хүрээнд хийгдэж байгаа. Ингэснээр төрийн ажлын бүтээмж сайжирна гэж үзэж байна. ИТХ-ын ажлын албаны орон тооны хязгаарыг тогтоож өгснөөр улсын хэмжээнд 162 орон тоо хасагдаж байгаа. Ингэхдээ зарим газар орон тоо буурч, заримд нь нэмэгдэж байгаа" гэв.           

ТӨРӨӨС ХУВИЙН ХЭВШИЛ, ИРГЭНД ТАВИХ ХЯНАЛТЫГ 50 ХУВЬ БУУРУУЛАХААР БОЛОВ

Иргэн, аж ахуйн нэгж, байгууллагад чиглэсэн төлөвлөгөөт хяналт шалгалтыг 2022 оны нэгдүгээр сарын 1-нээс 50 хувиар бууруулах, зарим шаардлагагүй шалгалтуудыг цуцлахаар болжээ. Мөн зөвхөн эрсдэлд суурилсан, зайлшгүй хийгдэх хяналт шалгалтыг төлөвлөж хэрэгжүүлэх, хяналт шалгалтыг цахим хэлбэрт шилжүүлэх юм. Сангийн сайд Б.Жавхлан "Хяналтын байгууллагууд УИХ-ын бүтцэд ч бий. Засгийн газрын нэлээд газарт ч бий. Эдгээрийг ялгаж салгах хэрэгтэй. Гэхдээ төрөөс төрд тавих хяналт шалгалт  хэвийн үргэлжилнэ. Харин хувийн хэвшил, иргэнд тавих хяналт шалгалтыг 50 хувь цөөлж, эрсдэлд суурилсан, зайнаас хяналт тавьдаг хэлбэр рүү шилжих бодлогыг тодорхойлсон. Энэ нь хяналт шалгалт суларлаа гэсэн үг биш. Цахимд суурилсан зайнаас хяналт тавих шинэчлэл рүү шилжиж байна" гэлээ.

 

Эх сурвалж: “Зууны мэдээ” сонин
С.Уянга

Бусдад түгээх
  • gplus

Сэтгэгдэл үлдээх

Уншигчдын бичсэн сэтгэгдэлд olloo.mn хариуцлага хүлээхгүй болно.
ХХЗХ-ны журмын дагуу зvй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зvйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 772-01100 утсаар хүлээн авна.

Сэтгэгдэлээ бичихХураах

тэмдэгтэнд багтааж бичнэ үү.