УИХ-ын гишүүн асан Д.Дондог нарын гомдлыг Давж заалдах шатны шүүхэд ирэх мягмар гаригт хэлэлцэхээр товложээ. Д.Дондогийг УИХ-ын гишүүн байх үеэс буюу 2008 оноос бусдын эд хөрөнгийг залилж, хувьдаа завшсан хэрэгт буруутган шалгаж эхэлсэн юм. Тэрээр туслах Г.Сайнбаяр нарын хамтаар “Меридан” гэх компанид их хэмжээний хохирол учруулсан хэрэгт буруутгагдсан. Түүнийг 400 орчим сая төгрөг залилж сонгуулийн сурталчилгаандаа ашигласныг хуулийнхан нотолсон гэдэг юм. Үүний дагуу анхан шатны шүүхээс өнгөрсөн наймдугаар сарын 15-нд Д.Дондогт 10.1 жил, түүний туслах Д.Сайнбаярт 12 жил, “Сумбар” компанийн захирал А.Батбилэгт 13 жилийн ялыг чанга дэглэмтэй хорих ангид эдлүүлэхээр шийдвэрлэсэн ч шүүгдэгчид эсэргүүцэж давж заалдах шатанд гомдол гаргажээ.
Анхан шатны шүүх хурлын үеэр УИХ-ын гишүүн асан Д.Дондогийн өмгөөлөгч болон ар гэрийнхэн “Энэ хэрэг зохион байгуулалттай хэлмэгдүүлэлт” хэмээн эсэргүүцэж байсан юм. Энэ талаар Д.Дондогийн ар гэрийнхнээс тодруулахад “Шүүхээс тулгасан ял хэлмэгдүүлэлт болсон. Д.Дондог бусдын явуулгаар хэрэгт холбогдчихсон. Давж заалдах шатны шүүх хэрэгсэхгүй болгоно гэдэгт итгэж байна” гэв.
Зууны мэдээ
Б.Заяа