Эрүүл мэндийн яамнаас шинэ төрлийн  коронавируст халдварын талаар ээлжит мэдээллийг хийлээ.

ХӨСҮТ-ийн Тандалт судлалын албаны дарга А.Амбасэлмаа "2021 оны нэгдүгээр сарын 3-ний өдөр  ХӨСҮТ-ийн вирус судлалын 3 лаборатори, ЗӨСҮТ-ийн вирус судлалын лаборатори, автолабораториуд, НЭМҮТ-ийн лаборатори, Сэлэнгэ, Дархан-Уул аймгийн салбар лабораториудад  нийт 13621 хүнд хийгдсэн шинжилгээнээс 23 тохиолдол нэмж бүртгэгдлээ. 

Илэрсэн 23 тохиолдлын 2 нь 2020 оны арванхоёрдугаар сарын 20-нд Токио-Улаанбаатарын онгоцоор ирсэн хүний 3 дахь давтан шинжилгээнээс илэрлээ. Хоёр нь Цэргийн төв эмнэлэгт эмчилгээнд оролцож байсан эмч, сувилагчаас илэрсэн. 19 нь Улаанбаатар хотын голомтуудын хавьтлаас илэрсэн байна. ХӨСҮТ-ийн батлагдсан тохиолдлын гэр бүлээс, "Мөнххада" ХХК-ийн ажилчдын гэр бүлээс, Баянзүрх дүүргийн нэгдсэн эмнэлэгтэй холбоотой хавьтлуудаас илэрлээ. 

 Дотоодын нийт тохиолдол 795 боллоо. 

Өнөөдөр 9 хүн эдгэрч эмнэлгээс гарлаа. Монгол Улсын хувьд нийт батлагдсан тохиолдол 1286, эдгэрсэн 878 хүн байна. ХӨСҮТ,  Цэргийн төв эмнэлэг, Сэлэнгэ аймгийн нэгдсэн эмнэлэг, Хан-Уул дүүргийн эмнэлэгт нийт  398  хүн эмчилгээнд байна" гэв.

С.Тайшир
Оллоо.мн