Бага насны хүүхэд хөнгөн балархай хэлбэрээр өвчилж бусад хүмүүст халдвар тараах эрсдэл маш өндөр
Эрүүл мэндийн яамнаас шинэ төрлийн коронавируст халдварын талаар ээлжит мэдээллээ хийлээ. Өнөөдрийн байдлаар коронавируст халдвар дэлхийн 216 улс орон нутаг дэвсгэрт бүртгэгдэж, 24 сая 455 мянган хүн коронавирусийн халдвар авч 841 мянган хүн эндсэн бол 17 сая гаруй хүн эдгэрч эмнэлгээс гарсан байна.  Сүүлийн 24 цагийн хугацаанд 281 мянган хүн шинээр халдвар авч, 6 мянга гаруй хүн эндсэн байна. 

Манай хөрш улсуудын хувьд сүүлийн 24 цагийн хугацаанд ОХУ-д 4829 шинэ тохиолдол бүртгэгдэж 110 хүн нас бараад байна. БНХАУ-д 22 тохиолдол бүртгэгдсэний 9-ийг гадаад улс орноос зөөвөрлөгдсөн гэж үзэж байна. 

БНСУ-ын эрдэмтэд бага насны хүүхэд хөнгөн балархай хэлбэрээр өвчилж 14-21 хоногийн хугацаанд бусад хүмүүст халдвар тараах эрсдэл маш өндөр байгааг тогтоосон байна. 

Харин манай улсын хувьд халдварын нөхцөл байдал ямар байгаа талаар ХӨСҮТ-ийн Тандалт судалгааны албаны дарга А.Амбасэлмаа  “Наймдугаар сарын 27-ны өдөр ХӨСҮТ-ийн 3 лаборатори болон Дархан -Уул аймгийн салбар лабораторид нийт 731 хүнд шинжилгээ хийхэд бүгд сөрөг гарлаа. Манай улсын хувьд зөөвөрлөгдөн орж ирсэн коронавируст халдварын батлагдсан тохиолдол 301, үүнээс 291 хүн эдгэрсэн байна. Эдгэрсэн хүмүүсээс гэрийн ажиглалтад 40, сувилалын ажиглалтад 25, тандалт судалгаа, ажиглалт дууссан 226 хүн байна.  Одоо ХӨСҮТ-д эмчлэгдэж байгаа 10 хүн байна. Үүнээс  9 хүний биеийн байдал хөнгөн, нэг хүний биеийн байдал хүндэвтэр байна" гэв

С.Тайшир
 
Бусдад түгээх
  • gplus