Коронавируст халдварын улмаас дэлхий дахин хөл хорионд ороод байна. Томоохон урлаг соёл, спортын арга хэмжээ цуцлагдаж, нэг дор олноороо цуглахыг хориглож буй. Гэтэл монголчууд үндэсний их баяр наадмаа хийхээр өдөр шөнөгүй бэлдэж байна. Аймшигт цар тахлыг ч мартав.
Бүр тодорхой хэлбэл, Тулгар төрийн 2229, Их Монгол Улсын 814 жил, Ардын Хувьсгалын 99 жилийн ойн Үндэсний Их баяр наадмын бөх, сур, шагайн харвааг “XIII зуун цогцолбор” зургаан насны морин уралдааныг “Хүй долоо худаг”-т зохион байгуулах шийдвэр гараад байна.
Энэ үйл ажиллагааг ард иргэд үзэж сонирхох хаалттай, харин ноёдод “нээлттэй” гэж байгаа. Үүнээс илүү олон нийтийн шүүмжлэлийг хүлээж байгаа зүйл бол наадмын төсөв. Жил жилийн наадмыг зохион байгуулахад улсын төсвөөс мөнгө зарцуулдаг. Нэг үгээр ард түмний татварын мөнгөөр үндэсний их баяр наадмаа хийдэг. Үндэсний гэх тодотголтой цөөхөн баяруудын нэг учир нь ийн хөрөнгө зарахад харамлан халаглах хүн байдаггүй. Гэтэл энэ жил үзэгчгүй наадамд гурван тэрбумыг үрэх нь. Яг өмнөх жилүүд шиг. Баатар найруулагчийн хийх контентод зориулж, ард түмний татварын мөнгөнөөс таслан “бэлэглэсэн” байгаа нь ийн шүүмжлэл дагуулж байна.
Өнөөдөр бол Монгол эдийн засгийн хүнд цаг үеийг туулж байгаа цаг үе. Улсын төсвийн орлого 1.2 их наяд төгрөгөөр тасарсан. Гэтэл төр улсын наадамд 3 тэрбумыг зарах шийдвэр гаргасан нь хэр оновчтой вэ?
Дээрээс нь аймаг сумдууд наадмаа хийнэ. Улс орон даяар хоёр өдрийн баярын арга хэмжээнд хичнээн төгрөг зарцуулахыг таашгүй.
ААН-үүд хаалгаа барьж, ажилчид нь зээлээ төлж чадахгүй бор хоногийг аргацаан өнгөрөөж байна. Гэтэл төр баяр ёслолд харамгүй цацаж байгааг тайлбарлахад ухаан хүрэхгүй.
Өнгөрсөн хоёрдугаар сард бид сар шинийн баяраа гэр бүлийн хүрээнд хамгийн цомхон, эдийн засагт хэмнэлттэйгээр тэмдэглэн өнгөрүүлсэн. Хэн ч эсэргүүцээгүй, хэн ч буруутгаагүй. Улс орон даяараа санхүүгийн маш том хэмнэлтийг хийж чадсан. Харин энэ удаад тэгсэнгүй. Тэгвэл яг дээрх шиг Үндэсний их баяр наадмаа цомхон гэр бүлийн хүрээнд тэмдэглэх шийдвэр гаргаж болох байсан уу? Мэдээж боломжтой. Хэн ч дургүйцэж, эсэргүүцэхгүй. Харин ч улс орон даяараа том хэмнэлтийг хийж буй шийдвэр гаргагчдаа талархан хүлээж авах байв. Гэвч тэд "13-р зуун" гэж нэрийдсэн амралтын газрыг бүхэлд нь тохижуулж, найрлан цэнгэхэд гурван тэрбумыг зарах гэж байгаа нь иргэдийн шүүмжлэлийг дагуулсаар байна. Тэд ноёд хойморт, жирийн ард “хатавчинд” суух наадамд ийм хэмжээний мөнгө зарж байгаад ийн эгдүүцэн бухимдаж байгаа юм. Би ч тэдний нэг....
О.ОНОН