Н.Номтойбаярт холбогдох хэргийн шүүх хурлыг  дахин хойшлууллаа
Шүүгдэгч Н.Номтойбаяр нарт холбогдох эрүүгийн хэргийн шүүх хуралдаан Чингэлтэй дүүргийн Эрүүгийн хэргийн анхан шатны шүүхэд өнөөдөр боллоо. Шүүх хуралдаанд шүүгдэгч Н.Номтойбаяр, Б.Нямдаваа нарын өмгөөлөгч Х.Базаррагчаа Дорноговь аймагт сонгуулийн ажилтай, шүүгдэгч Н.Баттөгсийн өмгөөлөгч Д.Батбаяр нь шүүх хуралдаан давхацсан гэх шалтгаанаар шүүх хуралдаанд ирээгүй. Мөн тэд шүүх хуралдааныг хойшлуулах тухай хүсэлт тус тус ирүүлсэн байна. Мөн шүүгдэгч Д.Ган-Эрдэнэ шинээр өмгөөлөгч авах хүсэлт гаргасан. Шүүгдэгч Н.Ууганбаярын өмгөөлөгч Б.Билгүүн нь шүүх хуралдааны тов мэдсэн боловч шүүх хуралдаанд хүндэтгэн үзэх шалтгаангүйгээр ирээгүй байна.

Иймд шүүхээс шүүгдэгч нарыг өмгөөлүүлэх эрхээр хангаж, шүүх хуралдааныг 2020 оны 06 дугаар сарын 26-ны өдрийн 10:00 цагт товлон зарлалаа. Шүүх хуралдаанаар шүүгдэгч нарт урьд авсан таслан сэргийлэх арга хэмжээнүүдийг тус тус хэвээр үлдээж шийдвэрлэлээ.

Шүүх хуралдааны дараа Н.Номтойбаярын өмгөөлөгч Н.Мандах “Шүүх хэргийн оролцогчдийн хүсэлтээр шүүх хурлыг хойшлуулж энэ сарын 26-ны өдөр болгон товлолоо. Урьд авсан таслан сэргийлэх арга хэмжээг хэвээр үргэлжлүүлэхээр боллоо. Миний хувьд Н.Номтойбаярт авсан цагдан хорих, таслан сэргийлэх арга хэмжээг өөрчилж өгөөч гэсэн хүсэлт тавьсан. Харамсалтай нь шүүх хүлээж авсангүй” гэв.

Б.Сувдаа
Бусдад түгээх
  • gplus