АНУ-д Монгол иргэн коронавирусийн халдвараар нас баржээ
АНУ-ын Чикао хотод амьдарч байсан Монгол иргэн коронавируст халдвараар нас баржээ.

Энэ талаар иргэн Л. Мөнхтөр өөрийн цахим хуудаснаа “Чикаго хотноо амьдарч байсан нэгэн монгол эр хүн, хүний сайн хань, хүүхдийн сайхан аав коронагаар өөд болжээ! Юутай харамсалтай вэ! Ар гэрийнх нь хүмүүс бас халдвар авсан бөгөөд, хайрт аав, халамжит ханиа алдсан тэд одоог хүртэл энэ аюулт тахалтай тэмцсээр байгаа юм байна. Амь зуух, амьдрах гэдэг өртөг өндөртэй хүний нутагт, үхэх нь бас түүнээс ч дутуугүй төлөөс зардалтай энэ нийгэмд, талийгаачийгаа чандарлан оршуулах зардалдаа тусламж хүсэж, хандив цуглуулж байгаа юм байна. Элгэн садан монгол ахан дүүс минь элэг эмтэлсэн уй гашуу, зовлон шаналлаас нь хуваалцаж, 5 тавдахгүй, 10 аравдахгүй, сэтгэлээрээ, боломжоороо хандив өргөж, халуун сэтгэлийн гараа сунгаарай! Өвчин тахал, үхэл зовлон гэдэг хэнийг ч хэдийд ч дайрч мэдэх болзоогүй болохоор жамын өмнө бүгдээрээ сэтгэл зүрх нэг байж, уй гашууд автсан нэгэндээ сэтгэлийн дэм хайрлацгаая! Цаг эргэж, цар тахал арилж, сайн цаг ирэхдээ л ирнэ. Энэ цагийг хамтдаа туулж, тэр цагийг хамтдаа угтацгаая!
Талийгаачийн хань ижил, үр хүүхэд, ах дүүс, амраг саданд нь гүн эмгэнэл илэрхийлье! Мөнх тэнгэртээ амгалан морилох болтугай! Хүндэтгэсэн; Л.Мөнхтөр Лос Анжелес 2020 оны 6 сарын 11” хэмээн бичжээ.

О.ОНОН
 
 
Бусдад түгээх
  • gplus