“Алтан Дорнод Монгол” ХХК-ийн ТУЗ-ийн дарга Т.Ганболд энэ удаагийн УИХ-ын сонгуульд бие даан нэр дэвшихээр болсон. Гэхдээ ганцаараа биш, бие даагчдын платформ үүсгэж өөрөө тэргүүлэх тухайгаа зарласан. Ингэснээр цөөнхийн цөөнх болсон хүчгүй бие даагч УИХ-ын гишүүдийн байр суурийг хүчирхэгжүүлж, улс орны төлөө ихийг хийх боломж бүрдүүлнэ хэмээн үзэж байгаа юм.
Түүний энэхүү санаачилгыг дэмжин, бие даан нэр дэвшихээр болоод байгаа салбар бүрийн манлайлагч, олны танил эрхмүүд Т.Ганболдтой “гар бариад” байгаа аж.
Тухайлбал, хийж буй ажлаараа олны танил болсон Эдийн засагч Т.Хасбаатар, Хууль зүйн ухааны доктор, профессор Л.Батжав, Улстөр судлалын доктор А.Саруул, Эрх зүйч, дуучин Т.Бат-Оргил, Олон улсын хуульч Ж.Оймандах, Зээлдэгчдийн холбооны тэргүүн, “Olloo” группыг үүсгэн байгуулагч П.Бүүвэйбаатар нарын эрхмүүд Т.Ганболдын бие даагчдын платформд багтсан байна. Т.Ганболд энэ удаагийн сонгуульд нийслэлийн Баянзүрх дүүрэгт бие даан нэр дэвшихээр төлөвлөөд байгаа билээ.
Бие даагчдын платформд нэр дэвшигчдээс гадна Бодлогын зөвлөлд Анагаах ухааны доктор Н.Одонгуа, Эдийн засагч Ж.Дэлгэрсайхан нарын 10 гаруй судлаач, эрдэмтэн докторууд багтаж, зөвлөгөө өгөн ажиллахаар болоод байгаа юм.
Эх сурвалж: Erennews.mn