Засгийн газрын хуралдаанаас гарсан шийдвэрийн талаар ОБЕГ-ын тэргүүн дэд дарга, бригадын генерал Г.Ариунбуян, Гадаад харилцааны яамын Консулын газрын захирал Л.Мөнхтүшиг нар мэдээлэл хийлээ.

ОБЕГ-ын тэргүүн дэд дарга, бригадын генерал Г.Ариунбуян “Өнөөдрийн байдлаар 35 орноос 9900 гаруй иргэн эх орондоо ирэх хүсэлт ирүүлсэн байна. Сүүлийн өдрүүдэд БНСУ-ын Элчин сайдын яамны гадаа манай улсын иргэд эмх замбараагүй байдал үүсгэх, дипломат ажилтнуудын биед халдах, нэр төрийг гутаах, зохисгүй үйлдэл гаргаж байна. Иргэдээ анхааруулж хэлэхэд Элчин сайдын яамны өдөр тутмын үйл ажиллагаанд нөлөөлөхгүй байх, хүндэтгэлтэй хандахыг УОК-оос зориуд анхааруулж байна.
 
Гадаад харилцааны яамны Консулын газрын захирал Л.Мөнхтүшиг "Ирэх өдрүүдэд явах чартер нислэгт ямар хүмүүс багтаж байгаа талаарх асуудал хүмүүсийн анхаарлыг татаж байна. АНУ-д байгаа болон Европын орнуудад сууугаа иргэдийг татан авах боломжийг хангах үүднээс Сөүлийн Инчеон онгоцны буудлаар дамжуулан транзит нислэг үйлдэхээр болсон. Маргааш буюу дөрөвдүгээр сарын 30-нд буюу маргааш Сөүл-Улаанбаатар чиглэлээр зөвхөн транзит зорчигчид буюу нийт долоон улсаас 273 зорчигч ирнэ. Тавдугаар сарын 1-ний Сөүл-Улаанбаатарын нислэгээр зөвхөн БНСУ-д оршин сууж байгаа 271 иргэн ирнэ. Мөн тавдугаар сарын 3-ний өглөө Франкфурт-Улаанбаатарын нислэгээр нийт 13 улсаас 263 зорчигч ирнэ" гэдгийн онцоллоо.
 
Улсын Онцгой комиссоос тусгай нислэгээр ирэх иргэдэд дараах таван шалгуур тавьж байгаа. Үүнд:
 
Эрүүл мэндийн шалтгаантай
 
Жирэмсэн
 
Өндөр настан болон асран хамгаалагчтай
 
Хөгжлийн бэрхшээлтэй
 
Бага насны хүүхэдтэй гэр бүл
 
Хүндэтгэн үзэх шалгаантай буюу оюутны байргүй, орох оронгүй болсон оюутнууд
 
Үүнээс гадна БНСУ-ын Хуульзүйн яамнаас визийн хугацаа хэтрүүлэн саатуулагдсан 30 гаруй иргэнийг тусгай нислэгтэй зайлшгүй багтаах шаардлага тавьж байгаа тухай мэдээллээ.


О.ОНОН