С.Эрдэнэ ба түүний нөхдөөс намаа аврах мөрөөдөлтэй АН-ын лидерүүд бие даагчдын эгнээг тэллээ

Барилгачин, барималчин, дуучин, жүжигчин, зураач, сошиал “од”-ууд  гээд арвин “цуглуулга” бүхий бие даагчдын нэрс задарлаа. УИХ-ын 2020 оны сонгуульд нэр дэвшихээр 208 бие даагч мөрийн хөтөлбөрөө Аудитад хүргүүлсэн байх. 

Бие даагчид дунд намаасаа “хөөгдсөн” хэсэг бүлэг хүмүүс багтсан байх. Тухайлбал, АН-аас гарсан Э.Бат-Үүл, С.Баярцогт, Д.Цагаан, Н.Алтанхуяг, Б.Дэлгэрмаа,  М.Ичинноров  нарын нэрс хөвөрнө. Ардчилсан намын зүгээс УИХ-ын сонгуульд нэр дэвших хүсэлтээ намын гишүүн бүрээсээ 100 сая төгрөгийн дэнчингийн мөнгө хураан авч байгаа. Гэхдээ энэ зөвхөн нэгдүгээр шат гэж байгаа. Энэ мөнгө цааш хэд болон нэмэгдэж, АН-ын нэг гишүүн УИХ-ын сонгуульд нэр дэвших эрхээ олж авахын тулд хичнээн төгрөг намдаа хандивлахыг таашгүй.  Нийгэмд шүүмжлэл дагуулж буй дэнчингийн мөнгөтэй зэрэгцэн АН-ын лидерүүдийн бие даах шийдвэр олон нийтийн анхаарлыг татаж эхлээд байна. Намаасаа “хөөгдөж” бие даахаар болсон АН-ын нөлөө бүхий лидерүүдийн хувьд намын удирдах түвшнийхэнтэйгээ үл ойлголцсоноос дээрх шийдвэрийг гаргаж буйгаа мэдэгдсэн. 

Тухайлбал УИХ-ын гишүүн Э.Бат-үүл “Манай намын "жинхэнэ" дарга З.Энхболд мэтийн ардчиллын дайснуудтай тэмцэхээр УИХ-ын сонгуульд бие дааж нэрээ дэвшүүлэхээр шийдэж хүсэлтээ өглөө. Намынхаа залууст Зи-г зайлуул гэж сануулсан байхаа. Миний намыг ардчиллын эсрэг турхирч байгаа З.Энхболдтой би тэмцэнэ. З.Энхболд хаана нэр дэвшинэ. Би тэнд нэр дэвших болно" гэв. 

Ийнхүү Ардчилалын “Алтан хараацай”-уудын нэг, АН-ын тулгын чулууг өрөлцсөн, намдаа болоод улстөрийн томоохон албан тушаалуудад эзэн сууж явсан Э.Бат-Үүл ганцаарчилсан мөрийн хөтөлбөр боловсруулж, ирэх сонгуульд хүч үзэх нь ээ. 

АН-аас “хөөгдөж” бие даахаар болсон дараагийн хүн бол Н.Алтанхуяг. Цагтаа АН-д эрх барих боломж олгож, намдаа нэгдүгээр хүнээр бичигдэж байсан ч өнөөдөр лидерийн тооноос хасагдаж, бие даахаар мөрийн хөтөлбөрөө боловсруулжээ. Түүний хувьд энэ талаараа цахим хуудаснаа “С.Эрдэнэ намайг АН-аас хассан тул УИХ-ын сонгуульд бие даан нэр дэвшихээр боллоо. Ардчилсан намаа үүсгэн байгуулалцаж, анхан шатнаас намын дарга болтлоо Ардчиллаа хамгаалж, шударга ёсыг сэргээн тогтоохын төлөө цаашдаа ч Та нартайгаа хамтдаа зүтгэнэ ээ” хэмээн мэдэгджээ. Ийн АН-ын лидерүүд С.Эрдэнэ ба түүний нөхдөөс намаа аврахаар бие даалаа. 

Угаас Ардчилсан нам бол үргэлж дотроо хагарч бутарч, бие биенээ хэмлэж, хэмхэлдэж дуусдаггүй улс төрийн хүчин. Энэ удаад лидерүүдээ талын нэг тарааж, өөр зуураа өрсөлдөж, улстөрийн тавцанд цоо шинэ жүжиг тавих нь ээ. Төгсгөл нь мэдээж ирэх зургадугаар сарын 24. 

О.ОНОН

 

Бусдад түгээх
  • gplus
Got error 12 from storage engine