УИХ-ын чуулганы өнөөдрийн хуралдаанаар эрхийн үндэсний комиссын дарга Ж.Бямбадоржийг үүрэгт ажлаас нь чөлөөлөх УИХ-ын тогтоол ийнхүү батласан юм.
Асуудлыг хэлэлцэх үеэр УИХ-ын гишүүн О.Баасанхүү тус байгууллагын үйл ажиллагаанд шүүмжлэлтэй хандаж байгаагаа илэрхийлж байв.
Тэрбээр “Хүний эрхийн үндэсний комиссыг татан буулгавал яасан бэ? Энэ байгууллага ямар хэрэгтэй юм бэ? Дүр эсгэсэн ардчилал дарангуйлалаас илүү аюултай. Энэ байгууллагынхан Монгол Улсад хүний эрхийг хамгаалдаг юм байна, хүний эрхийнхээ асуудлаар төр засагтаа ханддаг юм байна гэх ойлголтыг дэлхий нийтэд өгч байгаа. Гэтэл бодит байдал дээр энэ газрын даргаар эрэгтэй хүн тавина уу, эмэгтэй хүн тавина уу, залуу хүн тавина уу ялгаагүй. Тэр хүн улс төрийн үйл ажиллагаа эрхэлдэг, байгууллагынхаа дохиураар л ажилладаг. Одоо алуурчдыг өмгөөлөхөө болимоор байна, УИХ-ын дарга аа хатуу анхааруулж байна шүү. Бүх л бүтэн телевизээр хүртэл яриад...Шатаж нас барьсан нялх нойтон хүүхдүүдийг хайрлаж хамгаалж байгаа юм алга. Хүний эрх гэхээр дандаа хохироосон хүмүүсийн эрхийг яриад байдаг. Хохирсон хүмүүсийн эрхийг ярих хэрэгтэй байна. ХЭҮК гэдэг бол хүний эрхийг хамгаалдаг байгууллага баймаар байна” гэлээ.
О.ОНОН