УИХ-ын чуулганы өнөөдрийн хуралдаанаар Хүний эрхийн үндэсний комиссын дарга, гишүүний үүрэгт ажлаас чөлөөлөх тухай асуудлыг хэлэлцлээ. Хүний эрхийн үндэсний комиссын дарга Ж.Бямбадорж эрүүл мэндийн шалтгаанаар үүрэгт ажлаасаа чөлөөлөгдөх хүсэлтээ УИХ-д хүргүүлсэн юм. 

Хэлэлцэж байгаа асуудалтай холбогдуулан УИХ-ын гишүүн С.Жавхлан: Эрүүл мэндийн шалтгааны улмаас ажлаа өгч байна гэж л дээ. Наанаа гоё дүр эсгэсэн цаанаа Монголыг ёвроод, муулаад байгаа хүмүүс хол явдаггүй л дээ. Бие нь өвдөлгүй яахав дээ. Цаанаа атгаг, хачин зүйл бодож явдгаа боливол тэр хүн илаарших байх. Уг нь ажлаа өгч байгаа тэр хүн Монгол түмэндээ уучлаарай гээд хэлчихсэн бол ахмад хүний хувьд, эр хүний хувьд сайхан байх байлаа. Ингэж чадаагүй нь тэр хүний алдаа байлаа. 

Боловсролтой царайтай, дүр эсгэсэн, хувийн эрх ашиг хөөсөн  хүмүүсийг албан тушаал дээр тавьчихаар Монгол Улс хохироод байна. Дараа нь сэтгэлтэй, эрч хүчтэй, залуу хүн тавь. Үүний цаана дахиад нэг эмэгтэй байгаа. Тэр хүн бол би хэнийг ч шоронд хийнэ гээд яриад сууж байсан. Дараа нь тэр хүнийг оруулж ирэх хэрэгтэй.

Үүгээр  санал хураалтыг гар өргөж явуулахад хуралдаанд оролцсон гишүүдийн олонх нь дэмжсэнээр Хүний эрхийн үндэсний комиссын дарга Ж.Бямбадоржийг үүрэгт ажлаас нь чөлөөлөх УИХ-ын тогтоол ийнхүү батлагдлаа.

О.ОНОН