Говь-Алтай аймгийн Тамгын газрын байранд өнгөрсөн шөнө буюу энэ сарын 18-19-нд шилжих шөнө иргэн Б учир битүүлгээр нас барсан тухай эх сурвалжууд мэдээллээ. Тодруулбал, тус аймгийн Гэр бүл, хүүхэд залуучуудын хөгжлийн газрын дарга Б учир битүүлгээр нас барсан байдалтай машин дотроосоо олдсон байна. Эх сурвалжуудын мэдээллээр аймгийн Засаг дарга В.Рэнцэндорж Б-г гэрээс нь дуудаж ажлын байран дээрээ архидсан байна.
Энэ талаар ЦЕГ-ын Хэвлэл мэдээллийн төвийн ахлах мэргэжилтэн, ахлах дэслэгч М.Мөнхшүр “Өнөөдөр өглөө буюу хоёрдугаар сарын 14-ний өдрийн өглөөний 04 цаг 20 минутын орчимд ГАА-ийн Есөнбулаг суманд иргэн автомашиндаа нас барсан байна гэх дуудлага мэдээлэл цагдаагийн байгууллагад ирсэн. Тус дуудлага мэдээллийн дагуу ГАА-ийн жижүүрийн бүрэлдэхүүн мөн ахлах мөрдөгч нарын ахалсан бүрэлдэхүүн хэргийн газарт ажиллалаа. Тухайн хэргийн газарт 30 настай иргэн Б гэгч нас барсан нь тогтоогдоод шалгалтын ажиллагаа үргэлжилж байна. Урьдчилсан байдлаар аймгийн Засаг дарга удирдлагууд болон нэр бүхий субъектүүд аймгийн Засаг даргын албан өрөөнд архи согтууруулах ундаа хэрэглэсэн байж болзошгүй гэсэн нөхцөл байдал тогтоогдоод шалгалтын ажиллагаа үргэлжилж байна. Талийгаач Б нас барсан шалтгаан нөхцөлийг тогтоохоор шүүх эмнэлэгт задлан шинжилгээг томилоод шинжээчийн дүгнэлт гарахыг хүлээж байна.Одоогоор гэм буруугүйн асуудал ярихад эрт байна. Шалгалтын ажиллагаа үргэлжилж байна” гэлээ.
О.ОНОН