Тухайлбал,   дэлхий дээр нэг хэсэг Uber-ийн гэх аппликейшн ноёрхож байв. Энэ нь дэлхийн томоохон 700 гаруй хотод тархан үйл ажиллагаа явуулж байсан бол жилээс жилд энэ тоо нь буурч байна. Учир нь дэлхийн улсууд өөрийн гэсэн үндэсний аппликейшныг хэрэглэхийг зорьж, ажил хэрэг болгоод байна. 

Үүний нэг нь БНСУ-ын Какао. БНСУ энэхүү аппликейшнаа төрийн бодлогоор дэмжиж байна. Харин манай улс өнөөдрийг хүртэл такси үйлчилгээтэй холбоотой асуудал салбарын шүдний өвчин хэвээр байна. Гэвч өнөөдрийг хүртэл ОУ-ын жишигт нийцсэн аппликейшнууд хөгжүүлэлт хангалттай хэмжээнд хөгжөөгүй хэвээр....

Такси үйлчилгээ эрхлэгчид дэлхийн жижигт нийцсэн  аппликейшны хөгжлүүлэлт хийж байгаа ч  иргэдийн талархлыг хүлээсэн хэмжээнд хүртэл хөгжүүлж чадаагүй байгаа юм. Нэг үгээр манай улсад зам дээрээс зорчигчдыг авдаг үйлчилгээ “ноёрхсоор” байна. Үүнийг дагасан шүүмжлэлүүд ч тасрахгүй. Замын хөдөлгөөнд оролцож буй жолооч бүр халтуур хийж буй энэ нөхцөлд хариуцлага, үйлчилгээний соёл гэх мэт зүйлийн талаар ярилтгүй. Таксинд хувийн эд зүйлээ мартаж буусан бол эргүүлж олж авна гэдэг бас л үлгэр.

Дэлхийд такси үйлчилгээ эрхлэгчид хөгжлийн өөр түвшинд хүрчихээд байхад бид “халтуурчид”-ыгаа цэгцэлж, зохион байгуулалтад оруулж чадахгүй өнөөдрийг хүрсэн. Учир нь Монгол Улсын хууль, дүрэм, стандартын дагуу зөвхөн зөв талдаа жолооны хүрдтэй автомашиныг таксинд явуулдаг. Иймээс такси үйлчилгээ эрхлэхэд машинтай хүн халтуур хийж буй хүн бүрийг нэгтгэх боломжгүй. 

ОУ-ын жишигт нийцсэн такси  аппликейшны хөгжүүлэлтийг хэд хэдэн газар туршиж байгаа ч хуулийн зохицуулалт хаалт хориг болсон хэвээр байна. Хилээр зөв буруу гэлтгүй машин оруулдаг хирнээ такси үйлчилгээнд зөвхөн зөв тальдаа рультай машин явуулна гэдэг нь бас л өрөөсгөл. Өнөөдрийн байдлаар нийслэлд хөдөлгөөнд оролцож байгаа машинуудын ихэнх нь япон буюу буруу талдаа рультэй автомашинууд байдаг. Гэтэл хуулийн дагуу ийм машинууд  такси үйлчилгээ эрхлэгчдэд “гологддог”. 

Гэтэл яг ийм нөхцөлд халтуурны такси албан ёсны таксиг дампууруулж байгаа тухай шүүмжлэл хэр зохистой байж чадах вэ?  Хуулийн дагуу зөв талдаа рультай автомашиныг такси үйлчилгээнд явуулах ёстой. Харин халтуурчдын ихэнх нь буруу талдаа рультай автомашинтай байгааг анхаарах шаардлага тулгарч байна.

О.ОНОН