Үндсэн хуулийн хоёрдугаар хэлэлцүүлгийг өнгөрсөн сарын дундуур хийж дуусгасан. Хоёрдугаар хэлэлцүүлгийг дараа Үндсэн хуулийг өөрчлөх эсэхийг Ард нийтээсээ асуухаар санал асуулга явуулах тогтоолыг УИХ батласан юм. Улмаар Ард нийтийн санал асуулга явуулахад 30 орчим тэрбумын зардал гарах тооцоо гараад буй. Үүнтэй зэрэгцэн энэ удаагийн УИХ-ыг тарааж, ээлжит сонгууль явуулах тухай "бор шувуу нисэж" эхлэв. Төрийн ордонд намуудын удирдах түвшнийхэн болон бүлэг фракцаараа сэм уулзалдаж, УИХ-ыг тараахаар нууц гарын үсэг цуглуулж эхэлсэн тухай мэдээлэл газар авав.
Үүнтэй холбогдуулан оллоо.мн сайтын зүгээс "Хэрэв УИХ-ын сонгууль 11 дүгээр сард болвол улс төрийн аль намыг дэмжих вэ?" гэх санал асуулгыг өнгөрсөн есдүгээр сарын 25-ны өдрөөс эхлүүлсэн юм. Өнөөдрийн 08.00 цагийн байдлаар санал асуулгад нийт 1636 хүн хамрагдсан байна.
Намуудын санал авсан байдлыг авч үзвэл МАН 37 хувь, АН 33 хувь, ШИНЭ 18 МАХН 4 хувь, бусад намууд 1-3 хувийн санал авчээ.
МАН болон АН ээлжлэн төр барьж байсан ч энэ хугацаанд улс орон төдийлөн сайжирч иргэдэд хүртээмжтэй ажил хийхгүй байгаагаас үүдэн тэднийг үнэлэх иргэдийн үнэлэмж ч буурсаар буй.
Харин сар хүрэхгүй хугацааны өмнө Улсын Дээд шүүхэд бүртгүүлсэн ШИНЭ нам рейтинг өндөртэй байна. Тус намын дарга Ж.Батзандан, Л.Болд нар өнгөрсөн өвөл болсон МАНАН дэглэмийн эсрэг жагсаалд манлайлан оролцож, үүнийхээ дараа ШИНЭ байгуулна гэдгээ зарласан. Тэдний зүгээс "Монголын баялгийг Монголчуудад өгч чадах улс төрийн хүчнийг бий болгоно" гэх амлалтаа биелүүлж ШИНЭ намыг байгуулаад байгаа юм. Энэ утгаараа байгуулагдаад сар хүрэхгүй хугацааг үдсэн ч ШИНЭ нам иргэдийн итгэлийг хүлээж, 20 гаруй жил төрийн эрхийг барьсан хоёр том гэгдэх намын араас нэхэж эхэллээ.
О.УНДРАМ
Оллоо.мн