Засгийн газрын лхагва гарагийн хуралдаанаар Өмнөговь аймгийн Гурвантэс сумын нутагт орших Тост, Тосон бумбын нурууны байгалийн нөөц газрын хилийн заагийг өөрчлөн баталсан. Энэ тогтоолоор Тост, Тосон бумбын нурууны байгалийн нөөц газрын хилийн заагт өөрчлөлт оруулан 153482,37 га газар өргөтгөн нийт 896540,37 га газрын байгалийн нөөцийн ангиллаар улсын тусгай хамгаалалтад авахаар болсон юм. 

Мөн Улсын тусгай хамгаалалтад авсан газрын хилийн заагийг тогтоож буй газартай хэсэгчилсэн болон бүрэн давхцалтай ашигт малтмалын хайгуулын долоон тусгай зөвшөөрөл байдаг аж. Иймээс Засгийн газрын хуралдаанаас Монгол Улсын Шадар сайдаар ахлуулсан ЗГХЭГ-ын дарга, Хууль зүй, дотоод хэргийн сайд, Уул уурхай, хүнд үйлдвэрийн сайд, Байгаль орчин, аялал жуулчлалын сайд, Хүнс, хөдөө аж ахуй, хөнгөн үйлдвэрийн сайд болон хууль хяналтын байгууллагын удирдлагууд бүхий ажлын хэсэг байгуулсан. Энэ ажлын хэсэг нь ашигт малтмалын хайгуулын болон ашиглалтын лицензийн олголтод дахин хяналт тавих, лиценз олгохдоо хууль зөрчсөн байх магадлалыг шалгахаар болсон. 

Үүнтэй холбогдуулан Тостын нурууг тойрсон уурхайн боссууд дор бүрнээ онцгой байдал зарлаж, сандарч эхэлсэн тухай эх сурвалжууд мэдээлж байна. Тэд Шадар сайдаар ахлуулсан ажлын хэсгийн шалгалтын сургаар ийнхүү сандралд орж эхэлсэн байна. Гэмт хүн гэлбэлзэнэ гэдэг шиг. 

Тус бүс нутагт одоогоор ямар ямар уурхай үйл явуулж байгаа уурхайн талаар Өмнөговь аймгийн Улаанбаатар дахь нутгийн зөвлөлийн байгаль орчны салбарын дарга Ц.Бээжин “Тост, Тосонбумба орчимд яг одоо ажиллаж буй найман уурхай бий. Ноён суманд нэг бий. Эдгээр ажиллаж байгаа уурхайнууд бүгд Нарийн сухайтын бүлэг орд буюу стратегийн ордод ажилладаг. 10 гаруй хэсэг хувааж, гадаад дотоодын хувийн компаниудад 100 хувь эзэмшүүлсэн нь Үндсэн хууль болон Ашигт малтмалын тухай хуулийг зөрчсөн. 

 “Жавхлант орд” ХХК, “Тэра Энержи”ХХК, “Зэлэм”ХХК, “Эс Жи Эс”ХХЗ,  “Чинхау-Мак”, “Өсөх зоос” ХХК, “Жавхлант орд” ХХК-иуд яг одоогийн байдлаар Тостын нурууг аалзны тор шиг хэрэн үйл ажиллагаа явуулж байгаа” хэмээн мэдэгдсэн юм. 

Гэвч яг одоогийн байдлаар УИХ-ын гишүүн Б.Чойжилсүрэнг тойрсон асуудал хувирчихаад байна. Гэтэл яг тэр орчимд үйл ажиллагаа явуулж байгаа уурхайнууд ч бас хуулийн дагуу ажиллаж байгаа гэдэгт онцгой анхаарал хандуулах шаардлагатай. Нутгийн иргэдийн зүгээс ч ийм хүсэлтэй байгаагаа удаа дараа илэрхийлсээр байгаа юм. Иймээс Шадар сайдаар ахлуулсан ажлын хэсгийнхэн Тостын нурууг аалзны тор шиг хэрсэн уурхайнууд хуулийн дагуу ажиллаж буй эсэх нь шалгалтаар тогтоогдож таарна. Иймээс энэ  шалгалтын үр дүнгээр Тостын нуруу тэнийж, нутгийн эргээд амар тайван, аюулгүй орчинд амьдрах эсэх нь шийдэгдэж таарна. 

Н.АСРАЛТ

Оллоо.мн