Шүүх хурлын үеэр Б.Содномдаржаагийн ээж Б.Жавзмаагаас цөөн хэдэн асуултад хариулт авлаа.
-Та хүүтэйгээ хамгийн сүүлд хэзээ уулзсан бэ?
-Миний хүүг хэрэгт холбогдуулаад дөрвөн жил боллоо. Хүүг нь хилс хэргээр гүтгээд хорчихсонд харамсаж явдаг. Эхний үед хүүтэй минь уулзуулдаг ч үгүй байсан. Харин сүүлийн үед хэд хэдэн удаа уулзсан. Ж.Батзандан, Л.Болд, Ц.Нямдорж, Х.Нямбаатар нарын гишүүддээ их баярлаж байгаа. Миний хүүг 10 хоног эмчилгээ хийлгээд эмнэлгийн газар сувилуулаад нэг өрөөнд нь дарамтгүй байгаад л маш их баярлаж байна.
-Б.Содномдаржаа Т.Чимгээ нар биеийн эрүүл мэндийн байдал нь хэр байгаа бол?
-Зодуур нүдүүр үзсэн, хилсээр хэлмэгдсэн хүн шүү дээ. Биеийн эрүүл мэнд сайн биш. Нуруу нь өвддөг, хавирга нь хугарсан, өвдөг нь нь чичирдэг, зүрх нь өвддөг болчихсон. Миний хүү цоо эрүүл байсан. Одоо эрэмдэг зэрэмдэг болчихсон. Харин 10 хоногийн эмчилгээ хийлгэсэн. Ц.Нямдорж сайд миний хүү, Чимгээ хоёрыг эмчлүүлсэн. Эмнэлэгт нь байлгаж байгаад гаргая гэж хэлсэн шүү дээ. Их баярлаж байгаа. Б.Хурц гэдэг хүний командын хүмүүс өөрсдөө хийсэн хэргээ энэ хоёр хүн рүү зүтгүүлээд л байгаад байна. Хэрвээ тэгж зүтгүүлээгүй бол намайг яагаад энэ шүүх хурал оруулдаггүй юм бэ? Би хохирогч хүн. Би ормоор байна.
-Өнөөдрийн шүүх бүрэлдэхүүнд хэр итгэлтэй байна вэ?
-Өөрийгөө болоод ард түмнээ боддог бол үнэнээр нь шүүх байх. Хамгийн гол нь шударга шүүгээсэй л гэж хүсэж байна. Хүүгээ л сулламаар байна. Хүүгээ авч явах гээд хувцсыг нь торонд хийгээд ирсэн. 100 хувь итгэлтэй эрүүдэн шүүсэн нь ил болчхоод байна. Гэр бүлийн хүмүүсийг нь оруулахгүй юм. Яагаад оруулахгүй байгааг ойлгохгүй байна. Шүүх хурлаа нээлттэй хийх хэрэгтэй.
-Зориг агсны гэргий Булган энэ шүүх хуралд оролцож байна. Ер нь та бүхэнтэй уулзсан уу?
-Энэ хүнийг танихгүй, мэдэхгүй. Дээр шүүх хурал болоход бид цайны газар өмгөөлөгчөө хооллоод байж байхад орж ирсэн. Надтай мэндлээд гар барьсан.
-Энэ хүн бол цорын ганц гэрч шүү дээ. Энэ хүнээс хүсэх зүйл байна уу?
-Байлгүй яах вэ? Шүүх хурал дээр Булганыг энэ хоёр хүн мөн, биш гэдгийг хэлэх байх л гэж найдаж, хүлээж байна.
-Эрүүдэн шүүсэн бичлэгийг олон нийтэд цацсан шүү дээ. Бичлэгийн үзэхэд хүнд байв уу?
-Бичлэгийг хараад “Монгол хүн нэгнийгээ ингэж болдог юм байхдаа” гэсэн бодол төрж, ухаан балартаж, даралт ихсээд хэцүү байсан. Дараагийн өдөр нь хүүхдүүд үзүүлээгүй. Долоо хоног гарсан шүү дээ. Хүүхдүүд “Ээж минь та битгий тэр бичлэгийг үз, бие тань муудна” гээд үзүүлээгүй. Хүн солиод л миний хүүг дарамтлаад байсан шүү дээ. Зодоод л, нүдээд л Монгол хүн нэгнийгээ яагаад тэгдэг байна гэмээр...Би гомдож байна.
-Бичлэг ил болохоос өмнө хүүтэйгээ уулзахад зодож, дарамталж байгаа гэдгээ хэлж байсан уу?
-Үгүй. Сүүлийн үед л хүүгээрээ хэлүүлсэн. Эхний үед хүүтэйгээ уулзах ярих ч эрхгүй байсан шүү дээ. Бичлэг гарснаас хойш хүүтэйгээ гурав хоног уулзсан. Тэгэхэд “Миний хүүг яаж тэгж дарамталсан юм бэ” гэсэн чинь яг л тэр үйл явцыг л хэлсэн.
-Таны хувьд хүүгээ хэлмэгдсэн гэж үзэж байгаа. Тухайн үед яагаад танай хүүг сонгож хэрэгт холбогдуулсан гэж бодож байна вэ?
-С.Зоригийн амь насыг хөнөөсөн хэрэг гарахад миний хүү 22-хон настай, аав ээжийнхээ хажуунаас холдож үзээгүй хүүхэд байсан.
Хүн амины гэмт хэргээр хоригдож байсан Ц.Амгаланбаатар гэж гүтгэгч залуугийн үгээр миний хүүг хэлмэгдүүлсэн. Тагнуулынхан тэр Ц.Амгаланбаатарыг ашиглаж “Чамд мөнгө төгрөг, байшин сав өгнө” гэдэг ч юм уу тийм л аргаар энэ хэргийг зохион байгуулсан. Ц.Амгаланбаатар чинь ахынхаа авгайг гүтгэсэн шүү дээ. Манайх бол хамар хашааных айл. Одоо Ц.Амгаланбаатарын үгийг л сайн хэлүүлэх хэрэгтэй.
-Б.Содномдаржаагийн хүүхдүүд, та бүхний амьдралын нөхцөл байдал ямар байна?
-Сөнөсөн шүү дээ. Хоёр аав нь хоёулаа харвалттай. Нэг нь нүдний хагалгаанд орсон. Ар гэр амьдрах аргагүй болсон.
П.АНИР
Оллоо.мн