Алба хааж байсан цэрэг амиа алдсан асуудлаар Зэвсэгт хүчний жанжин штабаас дөнгөж сая мэдээлэл хийлээ.
Энэ хэрэгт ЗХЖШ-аас Ажлын хэсэг гаран ажиллаж байгаа аж.

Ажлын хэсгийн дүгнэлтээр:
 
-Ангийн удирдлагаас өдөр тутмын үйл ажиллагаанд тавих хяналт сул байсан
 
-Ангийн ахлагч сахилгын шийтгэл оногдуулах дүрмийг зөрчсөн 
 
-Эмнэлгийн анхан шатны тусламжийг хожимдож үзүүлсэн гэсэн гурван үндэслэл тогтоогджээ. Иймд шат шатны удирдлагад хариуцлага тооцохоор Батлан хамгаалахын сайдтай ярилцсан тухай ЗХЖШ-аас мэдээллээ.
 
Талийгаач Зэвсэгт хүчний 336 дугаар ангид Орхон аймгийн Баян-Өндөр сумаас 2018 оны хоёрдугаар ээлжээр хугацаат цэргийн албанд татагдан ирээд дөрвөн сар болсон. Энэ хугацаанд зодуулж, дарамтлуулдаг байсан тухай Тангарагийн баярын үеэр ээждээ ярьж, “Хурдан аваарай” хэмээж байсан. Мөн  энэ талаар ахтайгаа утсаар холбогдон хэлж байсан гэдгийг талийгаачийн ар гэрийнхэн хэлж байгаа юм. 
 
Бригадын генерал Б.Амгаланбаатар “Хэргийн мөрдөн байцаалтын ажиллагаа явагдаж байгаа учир хэн нэгний нэрийг дурдах боломжгүй.

Уг хэрэг явдал 2019 оны нэгдүгээр сарын 22-ний өдрийн 14.30-16.00 цагийн хооронд болсон. Энэ хугацаанд ангийн захирагчийн тогтоосон журмын дагуу тав зургадугаар цагийн хичээл орж байсан. Энэ үед салбарын ахлагч нар цэргийн ангид үзлэг хийсэн. Үзлэгийн явцад  эмх замбараагүй хадгалсан эд зүйлс, гар утас олдсон. Салбарын захирагч дотоод журмыг зөрчиж гар утсаар ярьсан байна хэмээн цэргүүдэд сахилгын арга хэмжээ авахуулах үүрэг өгсөн. Ахлагч цэргүүдийг талбай дээр гүйлгэсэн юм билээ.

Тухайн үед талийгаачийн дотор эвгүйрхээд гүйж чадахгүй байна гэсэн тайлбарыг өгч жагсаалаас гарсан. Тэгэхэд ангийн ахлагч “Баашиллаа” гэж цохьсон нь үнэн. Гэхдээ тэр цохилт үхэлд хүргэсэн эсэхийг шинжээчдийн дүгнэлтээр тодорхой болно.

Талийгаач гүйж байх хугацаандаа дотор нь эвгүйрхэж биеийн байдал нь муудсан. Талийгаачийн бие муудахад орон дээр хэвтүүлж, дэргэд нь байсан ахлагч нар гар хөлөнд нь массаж хийн, эмнэлгийн анхан шатны тусламж үзүүлсэн.
Дараагийн хичээл ороход талийгаач таталт өгсөн тул багийн эмчийг дуудаж талийгаачийг Зүүнбаянгийн эмнэлэг рүү авч явсан. Тэгтэл эмнэлэг рүү явах замдаа нас барсан.

Ингээд багийн эмч үзээд зүрх нь зогссон талаар хэлж, цагдаагийн байгууллагад мэдэгдсэн. Ар гэрийнхэнд нь бид өглөө дуулгаж ар гэрийнхэн нь удирдлагуудтай уулзсан. Одоо Зүүнбаянд цагдаагийн байгууллага, тагнуулынхан хэргийн газар ажиллаж байна” гэв.

Алба хааж байсан цэргүүд гар утсаар ярьж цэргийн дотоод журам зөрчсөн тул шийтгэл оногдуулж 17 цэргийг гадаа талбайд гүйлгэсэн юм билээ. Талийгаач ээжтэйгээ ярьсан эсэхийг бол мэдэхгүй. Тэр олдсон гээд байгаа утас нь байлдагч Отгонбаярын утас байсан юм билээ гэсэн тайлбарыг өгөв.

О.Гэрэл 
Оллоо.mn