УИХ-ын чуулганы хуралдаан эрхбиш сэргэж эхэлсэн нь өнгөрсөн долоо хоногийн нэг гол ололт байлаа. УИХ-ын гишүүд хэдий хэрүүл уруултай ч асуудлыг хэлэлцэж эхэлсэн нь төрийн эрх барих дээд байгууллагын ажил гацаанаас гарсны илрэл юм.

Үүнд М.Энхболдыг огцруулах жагсаалыг зохион байгуулсан залуу улстөрчдийн улстөрийн соёл чамгүй нөлөө үзүүлсэн ажээ. УИХ-ын гишүүн Л.Оюун-Эрдэнэ УИХ-ын дарга М.Энхболдыг огцруулах үйл явцын дунд гарсан зарим асуудлаар ёс зүйн хувьд уучлал гуйсан нь гацааг тайлахад их чухал алхам болжээ. УИХ-ын даргыг чирч гаргах гэсэн оролдлого таагүй, үл ойлгоцох байдал үүсгэнийг тэр тэмдэглэсэн юм. Мөн УИХ-ын гишүүн Лу.Болд, Ж.Мөнхбат нар нотолгоогүй мэдээллээр нэгнээ буруутгахыг оролдсондоо хүлцэл өчжээ.

УИХ-ын дарга М.Энхболдын асуудлыг ирэх пүрэв гарагт хэлэлцэж эхлэхээр болсон байна. Талууд асуудлыг хуулийн журмын хүрээнд, парламентат ёсны дагуу, нийгмийн амгалан тайван байдлыг хадгалах замаар зүй зохистой шийдвэрлэх тохиролцоонд хүрсэн байна.

Оллоо.мн