УИХ-ын гишүүн Д.Хаянхярваа нарын гишүүд Ерөнхий сайдыг огцруулах бичгийг өргөн барьснаас хойш улс төрд ширүүхэн үйл явц өрнөсөн юм. Харин өнөөдөр парламент бүтэн өдөржин 90 гаруй хувийн ирцтэйгээр хуралдсаны эцэст Ерөнхий сайд У.Хүрэлсүхийг суудалд нь үлдээлээ.
Тодруулбал, УИХ-ын чуулганы хуралдаан 73 гишүүний буюу гишүүдийн 94 хувийн ирцтэй байлаа. Чуулганы хуралдааны төгсгөлд байнгын хорооноос гаргасан дүгнэлтээр Ерөнхий сайд У.Хүрэлсүхийг огцруулах санал хураалт явууллаа. Хуралдаанд оролцсон гишүүдийн 45.3 хувийн санал нь огцруулах саналыг дэмжиж, олонх нь Ерөнхий сайдыг огцруулахыг дэмжсэнгүй.
Ингэснээр Ерөнхий сайд У.Хүрэлсүхийн тэргүүлсэн Засгийн газар үргэлжлүүлэн ажиллахаар болж байна.
Санал хураалт явуулахаас өмнө Ерөнхий сайд У.Хүрэлсүх УИХ-ын гишүүдэд хандан үг хэллээ. Тэрбээр “Засгийн газар үлдэх эс үлдэхийг хэдхэн секунтын дараа шийднэ. Бидэнд хийж хэрэгжүүлсэн их ажил байгаа. Эхлэх шатандаа явж байгаа ажлууд ч байна. Гарын алганаас өргөс авчихсан юм шиг нэг жилийн дотор бүх зүйлийг өөрчилнө гэж байхгүй. Надад цаг хугацаа хэрэгтэй байна. Би шударга ёсыг тогтоох, сахилга бат, дэг журмыг бэхжүүлэх, ажлын хариуцлагыг дээшлүүлэхийн тулд боломжтой бүхнийг хийнэ. Улсын эдийн засгийг сайжруулахын төлөө ажиллаж байна.
МАНАН хууль бусын пирамедийг эвдэхийн төлөө бүхнийг хийнэ. Байр суурин дээр хатуу байна. Парламентад сууж байгаа нэлээдгүй гишүүдтэй хариуцлага тооцно. М.Энхболд, Д.Хаянхярваа, С.Батболд нарыг огцруулах тухай асуудал яригдаад Д.Хаянхярваа даргыг огцруулсны дараа энэ 27 хүн гарын үсэг зурсан. Одоо эх орноо бод. Нөхөр М.Энхболд дарга өргөдлөө өг. Та УИХ-ын дарга хийх ёс суртахуунгүй хүн. Олон жил дарга хийлээ. Одоо болно УИХ-ын гишүүний ажлаа л хий. Хууль хяналтын байгууллагыг шахаж, дарамталдаг нь улстөрчид. Хуулийн байгууллагууд улс төрийн зэвсэг болж хувирсан. Хууль хяналтын байгууллага шударга ажиллаж байж нийгэмд шударга ёс тогтоно. Тоомоохон хэргүүдийн ард бид хамт гарч, буруутай этгээдэд хариуцлага тооцох ёстой. Үүнийг л ард түмэн шаардаж байгаа. Засгийн газар тогтсон ч эс тогтсон У.Хүрэлсүх би шударга бус асуудлын төлөө ясаа цайтал тэмцэнэ. Намайг худалдаж авна гэвэл худлаа. Айлгана гэвэл бүүр худлаа” гэлээ.
П.ГОО
Оллоо.мн