Энэ онд 18 цэцэрлэг шинээр ашиглалтад орно

Нийслэлийн Засаг даргын зөвлөлийн ээлжит хуралдаан өчигдөр/08.09/ боллоо. Хурлаар боловсролын салбарт хийгдэж буй хөрөнгө оруулалт, бүтээн байгуулалтын ажил зэрэг хэд хэдэн асуудлыг хэлэлцэв.

2018-2019 оны хичээлийн жилд улсын төсвийн хөрөнгөөр нийслэлд 42 шинэ цэцэрлэг, 10 цэцэрлэгийн өргөтгөл, 10 шинэ сургууль, 24 сургуулийн өргөтгөл, гурван бага сургууль, цэцэрлэгийн цогцолборын ажил, таван спорт заал шинээр барих ажлууд хийгдэж байна. Мөн Азийн хөгжлийн банкны хөнгөлөлттэй зээлийн хүрээнд таван шинэ цэцэрлэг, 17 цэцэрлэгийн өргөтгөл, хоёр шинэ сургууль, долоон сургуулийн өргөтгөл, Япон Улсын Засгийн газрын буцалтгүй тусламжаар хоёр шинэ сургууль, хоёр сургуулийн өргөтгөл, БНХАУ-ын Засгийн газрын буцалтгүй тусламжаар долоон шинэ сургуулийн барилга баригдах юм. 2018-2019 оны хичээлийн шинэ жилд нийслэлд нийтдээ 57 сургууль, 77 цэцэрлэгийн барилгыг шинээр барих буюу өргөтгөж байгаа аж..

“Энэ онд нийслэлийн хэмжээнд 18 цэцэрлэг шинээр ашиглалтад оруулахаар төлөвлөсөн. Эхний таван цэцэрлэг ашиглалтад орсон байгаа. Тав нь хичээлийн шинэ жилээс өмнө ашиглалтад орно. Үлдсэн найм нь энэ ондоо багтааж үүдээ нээнэ. Мөн энэ онд сургууль, цэцэрлэгт улс, нийслэлийн төсвийн хөрөнгө оруулалт болоод бусад санхүүгийн эх үүсвэрээр 10.6 тэрбум төгрөгийн санхүүжилтээр 84 их засвар, тохижилтын ажил хийгдэж байна” хэмээн нийслэлийн Засаг даргын орлогч Ш.Анхмаа танилцуулав.

Мөн шинээр сургууль, цэцэрлэг барихаар 39 байршил тусгагдсан. Нийслэлийн Газрын албанаас 33 байршилд газар чөлөөлөх ажлыг нөхөн олговортойгоор хийж байгаа юм. Энэ байршлууд дээр газар чөлөөлөхөд 135 иргэн, нэг аж ахуй нэгжид 7.6 тэрбум төгрөг нөхөн олговор олгожээ. Өнөөдрийн байдлаар газар чөлөөлөлт 90 хувьтай байна гэж нийслэлийн Газрын албаны орлогч дарга Д.Нямдаваа мэдээллээ.

Үүний дараа нийслэлийн Боловсролын газрын дарга Ж.Гантулга нийслэлийн төрийн өмчийн сургууль, цэцэрлэгийн хичээлийн шинэ жилийн бэлтгэл ажил, элсэлтийн үйл ажиллагааны зохион байгуулалтын талаар танилцуулга хийв. “Нийслэлийн хэмжээнд төрийн өмчийн 222, төрийн бус өмчийн 450 цэцэрлэгт 114250 хүүхэд хамруулах тооцоо байна. Төрийн өмчийн цэцэрлэгийн бүртгэлийг цахим хэлбэрээр зохион байгуулж байна. Төрийн өмчийн сургуулиудын хувьд нэгдүгээр ангид суралцах хүүхдүүдийн бүртгэл энэ сарын 20-30-ны хооронд сургууль дээрээ явагдана” гэв.

Хотын дарга төрийн бус өмчийн цэцэрлэг ажиллуулах хүсэлт ирүүлсэн газруудад яаралтай зөвшөөрөл олгох хэрэгтэй. Энэ нь цэцэрлэгийн ачааллыг бууруулах том ажил болно. Мөн сургууль цэцэрлэгийн урсгал засварын ажлуудыг энэ сарын 25-ны дотор бүрэн дуусгах хэрэгтэй. Сургууль, цэцэрлэгийн барилга барих газар чөлөөлөлтийг наймдугаар сарын 15-ны дотор дуусгах хэрэгтэй хэмээн холбогдох албаныханд үүрэг болгов гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээлэв.

 

Бусдад түгээх
  • gplus

Сэтгэгдэл үлдээх

Уншигчдын бичсэн сэтгэгдэлд olloo.mn хариуцлага хүлээхгүй болно.
ХХЗХ-ны журмын дагуу зvй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зvйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 772-01100 утсаар хүлээн авна.

Сэтгэгдэлээ бичихХураах

тэмдэгтэнд багтааж бичнэ үү.