УИХ-ын гишүүн Л.Оюун-Эрдэнэ УИХ-ын дарга М.Энхболдын “шүдний өвчин” болж байх шиг байна. Мартагдах шахсан 60 тэрбумын яриатай бичлэгийг дахин сөхөж гаргаж ирсэн. Энэ асуудлаар Нээлттэй сонсгол хийнэ гэсэн. Улмаар Ээлжит бус чуулган хуралдуулна гэж шаардлага өгнө гээд байгаа.
Тэр байтугай МАН-ын Хяналтын ерөнхий хороонд хандаж, 60 тэрбумын ярианд оролцсон М.Энхболд, Ц.Сандуй, А.Ганбаатар нарт ёс зүйн хариуцлага тооцох тухай тогтоол гаргуулчихав.
Ерөнхийдөө энэ талаар Л.Оюун-Эрдэнийн яриад, хийгээд байгааг олон нийт дэмжээд байгаа нь М.Энхболд даргад хамгийн төвөгтэй байгаа бололтой. Гэвч шаардсанаар нь 60 тэрбумаар Нээлттэй сонсгол хийж, Ээлжит бус чуулган зарлаад, өөртөө хариуцлага тооцолтой биш, мань эр өчигдөр /2018.8.7./ намынхаа шинэ, хуучин бүх даргыг Л.Оюун-Эрдэнэ рүү явуулсан байна.
Дарга нар нь Л.Оюун-Эрдэнийг дуудаж, тэд уулзалджээ. Ингэхдээ МАН-ын шинэ, хуучин дарга нар “М.Энхболдтой эвлэр” гэж Л.Оюун-Эрдэнийг ятгасан байна. Харин Л.Оюун-Эрдэнэ экс дарга нарынхаа үгийг хүлээж авах боломжгүй гэдгээ тайлбарлажээ.
Тэрээр “Энэ бол М.Энхболд, Л.Оюун-Эрдэнэ гэдэг хоёр хүний асуудал биш. Намайг ийм маягаар аргалах гээд хэрэггүй. М.Энхболд даргын 60 тэрбумаас болж МАН-ыг золиослох хэрэггүй. Шуудхан хэлэхэд, энэ 60 тэрбум, Эрдэнэтийн 49, 51 хувь, Бондуудын зарцуулалтын асуудал зэргийг ганц М.Энхболд, Х.Энхжаргал хоёроос болоод шийдэж чадахгүй бол 2020 онд МАН юу хэлээд зогсож байх юм бэ. Ард түмэн үүнийг хүсээд байгаа юм. Хэрвээ ийм байдлаар асуудлыг дарах гэж байгаа бол би тэмцлийн дараагийн шатанд тэмцэх болно” гэсэн хариуг өгчээ.
Х.Хулан
olloo.mn
Нэвтрэх