Энэ жилийн үндэсний их баяр наадамд зургаа давж, улсын харцага цол хүртсэн Баянхонгор аймгийн Баянбулаг сумын харьяат, “Хүч” спорт хороо, “Их богд” дэвжээ, “Баянхонгор хөгжил” сангийн бөх Н.Золбоо харцага цолны хишиг түгээх сайн үйлсийн аян зохион байгуулжээ.
Тэрбээр Баянхонгор сумын есөн багийн 90 хүүхдэд цүнх, дэвтэр ном, дүрэмт хувцас гээд хичээлийн иж бүрэн хэрэгсэл бэлэглэсэн байна. Ингэхдээ энэ жил нэгдүгээр ангид элсэн орох хүүхдүүдийг судалж, тэднээс нэн шаардлагатайд нь өөрийн биеэр бэлэг гардуулжээ. Тэрбээр хэлэхдээ "Бөхчүүд дандаа хүмүүсээс бэлэг авч байдаг. Бай шагнал, урамшуулал, тусламж дэмжлэг байнга авч байдаг учир хүүхдүүддээ цолныхоо хишгийг тарааж байгаа юм" гэв.
Энэхүү сайн үйлсийн аянг Баянхонгор аймгийн “Баянхонгор хөгжил” сантай хамтран зохион байгуулсан байна.
Б.Од