ОХУ, Монгол Улсын иргэд 2014 оноос хойш харилцан визгүй зорчих болсон. Үүнтэй холбоотойгоор ОХУ-ын Москва, Эрхүү, Улаан-Үд хот луу тогтмол шууд нислэг, галт тэрэг болон авто тээврийн хэрэгслээр зорчих урсгал ихэссэн нь жуулчдын тооны өсөлтөд эерэгээр нөлөөлж байна. Тухайлбал, өнгөрсөн онд ОХУ-аас Монгол Улсыг зорьсон иргэдийн тоо 2016 онтой харьцуулахад 21,7 хувиар өсч 106 мянган жуулчин зорчсон бол Монгол Улсаас 416 мянган жуулчин ОХУ руу зорчжээ.
ОХУ-ын иргэд бизнесийн аялал болон худалдаа наймаа хийх мөн амарч зугаалах зорилгоор Монгол Улсыг зорьдог байна. Түүнчлэн 1960-1990 онуудад Монгол Улсад ажиллаж, амьдарч, сурч байсан болон төрч өссөн Оросын иргэд түүхэн дурсгалт дурсамжийн аялал хийх сонирхолтой байдаг аж.
Мөн тус улсаас төмөр зам болон авто машинаар аялах жуулчдын тоо өсөх хандлагатай байгааг холбогдох албаны хүмүүс хэлж байна.
Монголчууд Орос хэлээр сайн ойлголцдог учраас Орос жуулчид хэлний бэрхшээлтэй бага учирдаг ажээ.
Эх сурвалж: Нийслэлийн аялал жуулчлалын газар