Ардчилсан намаас дөнгөж сая мэдээлэл хийлээ. Хэвлэлийн хуралд АН-ын Ерөнхий нарийн бичгийн дарга Ц.Туваан, нарийн бичгийн дарга О.Магнай, Хуулийн газрын дарга Д.Батхуяг  нар оролцож, сэтгүүлчдэд мэдээлэл өгсөн юм.

Мэдээллийн эхэнд АН-ын Ерөнхий нарийн бичгийн дарга Ц.Туваан тус намын Үндсэн дүрмийн хороо, улс төрийн зөвлөл өнөөдөр хуралдаж, АН-ын гишүүн, УИХ-ын гишүүн асан С.Баярцогттой холбоотой зарим шийдвэрийг гаргасан хэмээн мэдэгдлээ.

Үүний дараа АН-ын нарийн бичгийн дарга О.Магнай тус намын Улс төрийн зөвлөлөөс гаргасан мэдэгдлийг уншиж танилцуулсан юм. Тэрбээр  "Монгол Улсаа төлөөлж, гадаадын хөрөнгө оруулагч, хуулийн этгээдтэй гэрээ, хэлцэл байгуулахдаа эх орныхоо эрх ашигт ноцтой хохирол учруулж, улмаар авлига, хээл хахууль авсан нь шүүхээр нотлогдсон бол нам эвсэл, нэр нөлөө, эрх ямба харгалзахгүй хуулийн дагуу хатуу шийтгэгдэх ёстой гэж Ардчилсан нам үзэж байна.

С.Баярын тэргүүлсэн Засгийн газрын Сангийн сайд С.Баярцогттой холбоотой мэдээлэл цахим орчинд тархлаа. Дээрх мэдээллийн үнэн зөвийг албан ёсоор тодруулахаар Ардчилсан намаас Швейцарийн Холбооны Улсын прокурорын газарт албан ёсоор тодруулга авахаар хандсан. Энэхүү асуудалд С.Баярцогт гэм буруутайд тооцогдвол Монгол Улсаас Рио Тинто компанитай байгуулсан гэрээг эргэж харах зайлшгүй нөхцөл үүсэж болзошгүй юм.

Мөн Монгол Улсын Ерөнхий сайд асан С.Баярын тэргүүлсэн Засгийн газрын гишүүд болон Монголын улс төрчидтэй холбоотой офшор данс, авилга, хээл хахуулийн гэмт хэрэгг нэр холбогдсон асуудлуудыг нэг мөр болгон цаг алдалгүй шийдвэрлэхийг олонхийг бүрдүүлж буй УИХ, Засгийн газар, хууль хяналтын байгууллагуудаас Ардчилсан нам хариуцлагатайгаар шаардаж байна" гэлээ.



Үргэлжлүүлэн тус намын Үндсэн дүрмийн хорооны шийдвэртэй холбогдуулан АН-ын дарга С.Эрдэнийн гаргасан тушаалыг Хуулийн газрын дарга Д.Батхуяг уншиж танилцууллаа. Тушаалд "АН-ын гишүүн С.Бая рцогтыг тус намын гишүүнчлэлийн бүртгэлээс хассугай. Тушаалын хэрэгжилтийг хангаж ажиллахыг Ерөнхий нарийн бичгийн дарга Ц.Туваанд үүрэг болгосугай" гэжээ.