Засгийн газрын өчигдрийн хуралдаанаар Дорноговь аймгийн Алтан ширээ суманд нефть боловсруулах үйлдвэр барих шийдвэр гаргасан. Үүнтэй холбогдуулан Засгийн газрын Хэрэг эрхлэх газрын дарга Г.Занданшатар мэдээлэл хийлээ.
Тэрбээр "Энэ оны нэгдүгээр улиралд багтааж нефть боловсруулах үйлдвэрийн бэлтгэл ажлыг хангаж, ТЭЗҮ-ийг боловсруулна. Энэ ажил эхэлчихсэн байгаа. Хоёрдугаар улиралд багтааж нефть боловсруулах үйлдвэрийн барилгын ажлыг эхлүүлнэ.
Нефть боловсруулах үйлдвэртэй болсноор Монгол Улс шатахууны хувьд хараат бус болно. Дэлхийн зах зээлийн нефтийн үнэ, валютын ханшийн үнийн өөрчлөлтөөс шалтгаалж хэрэглэгчдийн нуруун дээр дарамт үүсэхээ болино.
Ингэснээр 1.2 тэрбум ам.долларыг шатахууны импортод зарцуулахаа больж, энэ мөнгө дотооддоо шингэнэ. Үүний үр дүнд эдийн засаг эрс сайжирна.
Нефтийн үйлдвэрийг дагаад химийн үйлдвэрүүд хөгждөг. Ажлын байр олноор бий болно гэсэн үг. Мөн олон жижиг үйлдвэрүүд хөгждөг. Зам барилгын ажилд ч ахиц дэвшил гардаг. Нефтийн үйлдвэр Монгол Улсын нийт ард иргэдэд өгөөжтэй, эдийн засгийн хувьсал гаргахуйц чухал бүтээн байгуулалт болно.
Улсынхаа стратегийн том үйлдвэрийг барих ажилд төрийн өмчийн компаниуд, Батлан хамгаалах яам, монгол цэрэг дайчлагдах болно" гэлээ.
Нэвтрэх