УИХ-ын үдээс өмнөх чуулганы нэгдсэн хуралдаанаар “Төсвийн тогтвортой байдлын зөвлөлийн дүрэм батлах тухай” УИХ-ын тогтоолын төслийг хэлэлцлээ. Хэлэлцэж байгаа асуудалтай холбогдуулан гишүүн Ц.Даваасүрэн уг тогтоолын төслийг УИХ-ын дэгийн тухай хууль зөрчиж байгааг анхааруулав.

Тэрбээр “УИХ-ын үйл ажиллагааг Дэгийн тухай хууль, УИХ-ын тухай хуулиар зохицуулдаг. Тогтоолоор зөвлөл байгуулаад УИХ-ын үйл ажиллагааг зохицуулах нь учир дутагдалтай. УИХ-ын тухай хуульд Төсвийн байнгын хорооны дэргэд Төсвийн алба байхаар заасан. Энэ бүтэц парламент хөгжсөн улс орнуудад байдаг. Төсөв хэлэлцэхэд тусалдаг, зөвлөмж гаргадаг байгууллага. Дөрөв таван гишүүн ажлын хэсэг байгуулаад тийм том судалгаа дүгнэлт гаргаад байна гэж байхгүй. УИХ өвлийн хүйтэнд нимгэн дээлтэй яваад байгаа хүн шиг болчхоод байна. Өөрийн үндсэн бүтэц туслах аппарат байхгүй. Гарч байгаа хуульд иргэд шүүмжлэлтэй ханддаг. Энэ нь төсвийн болон бусад байнгын хороодын дэргэд бүтэц байхгүйгээс үүдэлтэй. Судалгаа шинжилгээ хийхэд зориулсан алба ёстой. Энэ төсвийн зөвлөл бол дарга нар багтсан бүтэцтэй байх юм билээ. Энэ зөвлөл бол УИХ болон Дэгийн тухай хуультай зөрчилдөх нөхцөл байдал үүснэ” гэлээ.

 Үүнд УИХ-ын гишүүн Н.Амарзаяа “2018 төсвийн баталсантай холбогдуулан УИХ-ын тогтоолын төсөл гарсан.  Төсвийн тогтвортой байдлын зөвлөлийг байгуулах, дүрмийг байнгын хорооны тогтоолоор батлах гэсэн боловч гишүүдийн саналаар УИХ-ын тогтоолоор батлагдах ёстой гэсэн шийдвэрийн дагуу асуудлыг хэлэлцэж байна” гэсэн тайлбар хийсэн юм. 

Хуралдаанаар Төсвийн тогтвортой байдлын зөвлөлийн дүрэм батлах тухай УИХ-ын тогтоолын төслийг гишүүдийн олонхийн саналаар баталлаа.
 

П.ГОО
Оллоо.мн