Өвлийн аялал жуулчлалыг хөгжүүлэх зорилтын хүрээнд Нийслэлийн Аялал жуулчлалын газар, Улаанбаатар хотын Захирагчийн ажлын алба хамтран мөсөн сийлбэрийн гайхамшигт бүтээлүүдийг урласан "Мөсөн хотхон"-ыг нээлээ.

Өвлийн улиралд иргэдийн чөлөөт цагаа зөв боловсон өнгөрүүлэх, дэлхийд танигдсан уран бүтээлчдийн хийж бүтээсэн мөсөн баримлыг үзэж сонирхох, мөсөн гулгуурын талбайд тэшүүрээр хичээллүүлэх, гадаад дотоодын жуулчдыг татах зорилгоор Сэлбэ голын ай сав дотор уг хотхоныг бүтээн байгуулсан байна.

Мөсөн хотхон нь насанд хүрэгсэд болон хүүхэд гулгах зориулалттай мөсөн гулгуурын талбай, олон улсын мөсөн баримлын уралдаанд байр эзэлж байсан шилдэг өвлийн олимпийн болон чөлөөт сэдэвт мөсөн барималууд, төөрдөг байшингаас бүрдэнэ. Мөн хувцас солих байр, халуун цай кофе уух байр, гэрэлтүүлэг, гэрлэн чимэглэл зэргээр тохижуулан иргэдийн тав тухыг бүрдүүлэхээс гадна нийслэлийн өнгө төрхийг чимсэн бүтээлийн нэг болжээ.

Дэлхийн хүн амын 50 хувь нь цас үзэж байгаагүй бөгөөд үүнд Австрали, Африк, Төв болон Өмнөд Америк, Ази тивийн иргэд хамаардаг байна. Иймд олон сар үргэлжилдэг өвлийн хүйтэн саруудад тусгай сонирхлын аяллыг хөгжүүлж жуулчдыг татах асар их нөөц бололцоотой юм.

Б.Орхон