Тэгвэл олон нийтэд танил бус Х.Хэрлэн гэгч хэн бэ?
Түүний намтрын товчоон буюу өнөөдрийн өндөрлөгт хүрэх түүх 2000-2006 онд АМХЭГ-т Кадастрын албаны даргаас эхлэлтэй. Улс төр бизнесийн хүрээнийхэн түүнийг “Кадастр”-ын Хэрлэн гэдгээр нь андахгүй. Өөрийн овгоо “Кадастр” гэх нэрээр “сольсон” учир нь АМХЭГ-т Кадастрын албаны даргаар ажиллаж байхдаа лицензийн хууль бус наймааг “хөгжүүлэхэд” үнэтэй хувь нэмэр оруулж, толгой баячуудын тоонд орсон нэгэн. Улмаар тэрбээр уул уурхайн томоохон компаниудын хувьцаа эзэмшигч болж карьеараа өсгөсөн гэж байгаа. Түүнийг түүний хүрээнийхэн андахгүй.
Түүнтэй холбоотой зарим нэг мэдээллийн зах зухаас дуулгахад, Ашигт малтмалын Хэрэг эрхлэх газрын геологи, уул уурхайн кадастрын албаны дарга Х.Хэрлэнгийн гарын үсэг бүхий 2002 оны тавдугаар сарын 15-ны өдрийн 441А тоот лицензээр “Алтан дорнод” ХХК-д Заамарын Ар наймганы 485 га газрыг 60 жилийн хугацаатайгаар эзэмшүүлжээ. Мөн тэр Монгол, Болгарын хамтарсан “Монголболгаргео” ХХК, “Дарханы төмөрлөгийн үйлдвэр” ХК-ийн ТУЗ-ийн дарга.
Түүнийг 2005 оны наймдугаар сараас эхлэн Улсын мөрдөн байцаах газраас ашигт малтмал эрхлэх албан ёсны зөвшөөрлийг хууль бусаар өөр этгээдэд давхардуулан олгосон хэргээр эрүүгийн хэрэг үүсгэн шалгаж байсан тухай ч хэвлэлүүдэд бичигджээ. Мөн Х.Хэрлэн хагас цагийн дотор 120 өргөдлийг авч, бүгдийг хууль бус лиценз болгож рекордыг ч тогтоож байсан байх юм.
Энэ мэт түүнтэй холбоотой хууль бус үйлдлүүд захаас аваад тоо томшгүй. Гэтэл эрхэм Ерөнхий сайд У.Хүрэлсүх таны “Хууль зөрчсөн, хээл хахууль өгч орсон байж болзошгүй, төрийн ажил хийдэггүй, хийдүүлдэг, сахилга хариуцлагагүй, дэг журамгүй, төрийн ёс дүрмийг зөрчдөг нөхдүүдийн толгойг илж суухгүй” хэмээх үгтэй энэ томилгоо авцалдахгүй байна.
Таныг МАН-ын генсек байх үед шадар туслахаар чинь ажиллаж байсан Х.Хэрлэн ийнхүү бүхэл бүтэн агентлагийн даргаар томилогдож байгаад та ямар тайлбар өгөх вэ?
Ашиг сонирхол уу, ахын хайр ивээл үү? Таны амласан улс орныхоо амьдралыг өөд нь татах, сахилга бат, дэг журам, ажлын хариуцлагыг сайжруулах, ядарсан эдийн засаг, ард түмнийхээ төлөө ажиллаж байгаа байдал энэ үү. Надад бол халаасандаа хадгалсан цэргүүдээ ганц тушаалаар генерал болгож байгаа дүр зураг л харагдаж байна....
П.ГОО
Оллоо.мн