“Дэлхийн мисс 2017” тэмцээнд эх орноо төлөөлөн оролцож буй Ц.Энхжин “Зорилго бүхий гоо бүсгүй” төрөлд шилдэг 20-д шалгарчээ. Тэрбээр уг төрөлд гэр хороолол, сумдын сургууль, цэцэрлэгийн модон жорлонг боловсон ариун цэврийн өрөөгөөр солих төслөөр оролцсон байна.
Ц.Энхжин энэ талаар өөрийн фэйсбүүк хуудаснаа “Дэлхийн миссийн тэмцээний хамгийн чухал шалгуур болох "Зорилго бүхий гоо бүсгүй" төрөлд шилдэг 20-д шалгарлаа. Яг одоо бид шүүгчдийн өмнө төслийн танилцуулга илтгэлээ тавьж байна” гэжээ.
Дэлхийн миссийн тэмцээн нь “Зорилго бүхий гоо бүсгүй”, “Мисс авьяас”, “Мисс спорт”, “Мисс топ модель” болон “Мультимедиа төрөл” үндсэн таван шалгаруулалттай. Эхний дөрвөн төрөл оролцогчийн бэлтгэл, оролцооноос хамаарах бол сүүлчийн “Мультимедиа төрөл” эх орны эв нэгдэл, хамтын дэмжлэгээс шууд хамаарах аж.
Б.Орхон