Төрийн тусгай хамгаалалтын газрын хамгаалалтын албаны хамгаалагч П.Мөнх-Оргилд шүүгчийн хараат бус байдалд нөлөөлөхийг оролдсон үндэслэлээр Зөрчлийн тухай хуульд заасны дагуу хариуцлага тооцохоор болжээ.

Нийслэл дэх захиргааны хэргийн анхан шатны шүүхийн шүүгч БОАЖЯ-нд баримт бичгийн үзлэг хийх болсон талаар урьдчилж мэдэгдсэний дагуу 2017 оны аравдугаар сарын 27-нд очиход хамгаалалтын албаны хамгаалагч П.Мөнх-Оргил "зөвшөөрөл аваагүй” үндэслэлээр яамны байранд нэвтрүүлээгүй аж.

Шүүгчийн эрх зүйн байдлын тухай хуульд "...Ерөнхийлөгч, Улсын Их Хурлын дарга, Ерөнхий сайд, Улсын Их Хурлын гишүүн болон Засгийн газрын гишүүн, төрийн болон нутгийн өөрөө удирдах байгууллага, төрийн бус аливаа байгууллага албан тушаалтан, иргэн хэн боловч шүүгчээс шүүн таслах үүргээ хэрэгжүүлэхэд хөндлөнгөөс оролцох, нөлөөлөхийг хориглоно” гэж заасан байдаг.

Мөн Захиргааны хэрэг шүүхэд хянан шийдвэрлэх тухай хуульд "Захиргааны хэргийн шүүх хэрэг хянан шийдвэрлэхэд ач холбогдол бүхий нотлох баримтыг байгууллага, албан тушаалтан, хүнээс гаргаж өгөхийг шаардах эрхтэй бөгөөд холбогдох этгээд шаардлагыг биелүүлэх үүрэгтэй.”, 38 дугаар зүйлийн 38.3 дахь хэсэгт "Бичмэл нотлох баримтыг шаардан авахад бэрхшээлтэй байвал ... түүний хадгалагдаж байгаа газарт нь шүүх үзлэг явуулна” гэж заасны дагуу аливаа төрийн байгууллага, албан тушаалтан шүүгчийг нэвтрүүлэх, үзлэг хийх боломжоор хангах үүрэгтэй байдаг аж.

Мөн Шүүхийн ерөнхий зөвлөлөөс холбогдох байгууллагуудад дахин ийм зөрчил гаргахгүй байхыг сануулж, албан бичиг хүргүүлжээ. 

Б.Орхон