Нийслэлийн Байгаль орчны газар, Монголын Бурхан шашинтны төв Гандантэгчэнлин хийд, Монголын Бөөгийн нэгдсэн эвлэл хамтран “Хадгаа дээдэлье, байгалиа хамгаалъя” уриалга гаргасан.
Энэхүү уриалгын хүрээнд НБОГ, Тарвалин хийдийн лам хуврагуудтай хамтран ногоон бүсийн ойн сан бүхий газарт ургаа модонд уясан хадаг, байгальд сөрөг нөлөө үзүүлэхүйц байдлаар байрлуулж орхисон шашны эд хэрэглэлүүдийг цэвэрлэж, устгах ажлыг энэ сарын 7-8-ны өдрүүдэд зохион байгууллаа.
Цэвэрлэгээнд НБОГ-ын албан хаагч, лам хуврагуудаас бүрдсэн 41 хүн оролцож, БЗД-ийн 20, СХД-ийн 24, 25 дугаар хорооны 13 га орчим талбайгаас таван портер хадаг шашны эд хэрэглэлийг хураан устгалд оруулж, цэвэрлэсэн байна.
Ногоон бүсийн ой, ургаа модонд хадаг уях, шашны зан үйлтэй холбоотой эдлэл хэрэгслийг их хэмжээгээр тавьж орхих зэрэг нь байгаль орчинд сөрөг нөлөө үзүүлж модны ургалтыг зогсоодог. Иймд жижиг шашны зан үйл хийх, хадаг хэрэглэхтэй холбоотой орчныг бохирдуулах, мод ургамлыг гэмтээхгүй байхыг иргэд сүсэгтэн олонд НБОГ-аас анхаарууллаа.
Б.Орхон