Өвөрхангай аймгийн нутаг дэвсгэрт аадар орж, үер буусны улмаас Арвайхээр-Баянхонгор чиглэлийн автозамын Шаргын голын гүүрний шороон далан эвдэрч, автозам сэтэрсэн билээ. Улмаар автозамыг засахаар “Өвөрхангай-АЗЗА” ТӨХК-ийн 4 ажилтан, орон нутгийн 3 иргэн, нийт 7 хүн, 3 техник хэрэгсэлтэйгээр ажилласан.

Тэгвэл  засварын ажил дуусч, тээврийн хэрэгсэл чөлөөтэй зорчиж буй талаар орон нутгийн эх сурвалж мэдээлэв.

Автозамын эвдрэлийн улмаас Авто тээврийн үндэсний төвийн Хөдөлгөөний хяналтын хэлтсээс хот хоорондын зорчигч тээврийн 16 автобусыг Баянхонгор суманд, 11 автобусыг Арвайхээр суманд түр саатуулан, нийт 27 тээврийн хэрэгсэл, 500 гаруй зорчигчийн аюулгүй байдлыг хангаж ажиллажээ.