Наадмын үеэр эрүүл мэнддээ анхаарахыг зөвлөлөө
Зуны улирал, тэр дундаа баяр наадмын өдрүүдэд зонхилон тохиолдож болзошгүй аюулт өвчлөлөөс сэрэмжлүүлэх зорилгоор өнөөдөр ЭМЯ, НЭМГ, НЭМҮТ, ЗЦА-наас хамтран хэвлэлийн бага хурал хийлээ.

Хэвлэлийн бага хуралд Эрүүл мэндийн яамны Нийгмийн эрүүл мэндийн газрын дарга Д.Ганцэцэг, Нийгмийн эрүүл мэндийн үндэсний төвийн ерөнхий захирал Б.Цогтбаатар, Нийслэлийн эрүүл мэндийн газрын Эмнэлгийн тусламжийн хэлтсийн дарга М.Мөнхдэлгэр, Замын цагдаагийн албаны Урьдчилан сэргийлэх хэлтсийн дарга, хурандаа Э.Бөхбат нар оролцов.

Монгол Улсын хэмжээнд хүн амын дундах нас баралтын тэргүүлэх шалтгаанд зүрх судасны өвчлөл, хавдар, зам тээврийн осол гэмтэл багтаж байна. Тухайлбал, өнгөрсөн 2016 оны байдлаар нийт 107.559 хүн осол гэмтэлд өртсөн судалгаа гарчээ. Тэр дундаа зам тээврийн ослоор 17.197 хүн гэмтэж, 484 хүн нас барсан нь нийт осол гэмтлийн шалтгаант өвчлөл, нас баралтын шалтгаан болж байгаа юм.

Харин хоол хүнсээр дамжих өвчин, гэдэсний халдварын хувьд 2016 оны байдлаар улсын хэмжээнд бактерийн гаралтай хоолны хордлогот халдварын 430, сальмонеллёзын 181, цусан суулгын 2848 тохиолдол бүртгэгджээ. Өвчлөлийг сараар нь үзвэл дөрөвдүгээр сараас ихэсч, 5-7 дугаар сард дээд цэгтээ хүрч, есдүгээр сараас буурч эхэлсэн байна. Энэ нь дулааны улиралд хоол хүнсээр дамжих өвчин болон гэдэсний халдварууд мэдэгдэхүйц нэмэгддэг болохыг илтгэж байгаа юм.

Мөн энэ оны долдугаар сарын 03-ны өдрийн байдлаар 12 аймгийн 29 сум, нийслэлийн 4 дүүрэгт нийт 42 удаагийн усны осол гарч, 53 хүн амь насаа алджээ. Үүнээс 10 нь хүүхэд, 43 нь насанд хүрэгсэд байна.

Тиймээс үндэсний их баяр наадмын өдрүүдэд эрүүл мэнддээ сайтар анхааран наршилт, даралт ихсэх, усанд живэх, хоолны болон архины хордлого, зам тээврийн осол гэмтлээс урьдчилан сэргийлж, анхаарал болгоомжтой амарч зугаалахыг Нийслэлийн эрүүл мэндийн газраас ард иргэддээ сэрэмжлүүлж байна.

 
  1. Автомашины бүрэн бүтэн, аюулгүй байдлыг хангах
  2. Суудлын бүсээ зүүх, бага насны хүүхдийг зориулалтын суудалд суулгах
  3. Наймаас дээш сартай жирэмсэн эхчүүд хол замд зорчихгүй байх
  4. Орон нутгийн замд хурдыг 80 км/ц-аас хэтрүүлэхгүй байх
  5. Архи дарс хэтрүүлэн хэрэглэхгүй байх
  6. Согтууруулах ундаа хэрэглэсэн үедээ гол усанд орохгүй, автомашин жолоодохгүй байх
  7. Үер усны аюулаас болгоомжилж, гол усны түвшин нэмэгдэж байгаатай холбогдуулан голд сэлэхгүй байх
  8. Гол усны ойр орчим бага насны хүүхдийг хараа хяналтгүй үлдээхгүй байх
  9. Ил задгай газраас хоол хүнс худалдан авахгүй байх
  10. Хоол хүнсээ зөв хадгалан, гарын ариун цэврийг сайтар сахих
  11. Даралтны эмээ тогтмол ууж, хэт халалтын үед наршихаас сэргийлж гадуур явахгүй байх, битүү нимгэн хувцас өмсөх, шүхэр авч явах
Бусдад түгээх
  • gplus