АНУ-ын жуулчин “Оюутан цагдаа” нарт талархал илэрхийлэв

“Жуулчинд ээлтэй оюутан цагдаа-2017” хөтөлбөр эхэлж, оюутан цагдаа нар үүрэг гүйцэтгэж эхлээд долоо хоногийн хугацаа өнгөрч байна.

Тэгвэл ШУТИС-ийн оюутан Ж.Анужин, О.Бат-Эрдэнэ нар АНУ-ын жуулчинд том тус хүргэжээ. Жуулчин Карл хоолны газраар үйлчлүүлэхдээ өөрийн төлөх ёстойгоос илүү мөнгө төлснөө буюу олон улсын картаас нь их хэмжээний мөнгө хасагдсан байхыг тус газраар үйлчлүүлснээсээ хэсэг хугацааны дараа мэдэж, оюутан цагдаа нараас тусламж хүсчээ.

Тэрбээр “Олон улсын картын төв” хайж яваад оюутан цагдаа нартай тааралдсан. Тэд надад тусалж, цагдаагийн байгууллагадаа мэдэгдэж өгсөн юм. Би хоолны газраар үйлчлүүлээд 36 мянган төгрөгийн тооцоо хийх ёстой ч миний картаас 3.6 сая төгрөг хасагдсан байсан, санамсаргүй тохиолдол байх. Оюутан цагдаа нартай тааралдсаны ачаар би мөнгөө буцаан авч чадсан. Надад тусалсан оюутан цагдаа нарт болон Монголын цагдаагийн байгууллагад маш их баярлаж байна” гэлээ.

Оюутан цагдаа нар нийслэлийн жуулчны урсгал ихтэй гудамж, талбайд эргүүл хийж, жуулчдад зориулсан томоохон үйл ажиллагаа, соёл урлагийн арга хэмжээ, үндэсний баяр наадмын үеэр болон “Шөнийн Улаанбаатар” гудамжинд ажиллаж гадаадын иргэн, жуулчдын аюулгүй байдлыг хангах, туслан дэмжих, нийслэл хотоо танилцуулах зэргээр ажиллаж буй юм.

Жуулчны улирлын хугацаанд “Оюутан цагдаа” нар ажилласнаар гадаадын жуулчид ямар нэг зөрчилд өртөх нь 30 хувиар буурсан үзүүлэлт гарсан байдаг.
 

Б.Орхон

Бусдад түгээх
  • gplus