Гурван аймагт түймэр гарчээ
Он гарсаар улсын хэмжээнд ой, хээрийн түймэр нийслэлд 10, 12 аймгийн 42 суманд 69 удаа, нийт 79 удаа гарчээ. Өнөөдрийн байдлаар Сэлэнгэ, Төв, Хөвсгөл аймаг, Нийслэлийн Байнзүрх дүүрэгт гарсан ойн түймрийг цурманд оруулсан, бүрэн унтраахаар ажиллаж байна. Харин Булган аймгийн Хутаг-Өндөр суманд гарсан түймрийг бүрэн унтраажээ.
 

Тухайлбал, Сэлэнгэ аймгийн Ерөө сум, Төв аймгийн Эрдэнэ сумын зааг “Арцат” уулын орчим  гарсан ойн түймэрт /05.17/ ОБЕГ-ын харьяа Аврах тусгай ангийн 12 албан хаагч, Мандал суман дах Онцгой байдлын хэлтсийн 26 албан хаагч, Дархан –Уул аймгийн Онцгой байдлын газрын 21 албан хаагч, Хан Хэнтийн тусгай хамгаалалтын газрын 6 ажилтан, орон нутгийн 26 иргэн, нийт 91 хүн ажиллаж энэ сарын 7-нд цурманд оруулсан.

Мөн Хөвсгөл аймгийн Цагаан-Үүр сумын Уйлган багийн “Барсага” гэдэг газар /05.27/ гарсан ойн түймэрт тус аймгийн Онцгой байдлын газрын 12 албан хаагч, орон нутгийн 25 иргэн, нийт 37 хүн ажиллаж тавдугаар 31-ний өдөр цурманд оруулжээ.

Нийслэлийн Баянзүрх дүүргийн 11 дүгээр хороо, Богдхан уулсын “Залаатын ам” гэдэг газар /06.05/ ойн түймэр гарч НОБГ-ын Аврах анги, Гал түймэр унтраах, аврах 63, 35 дугаар ангиудын 45 албан хаагч, Богдхан уулын дархан цаазат газрын хамгаалалтын захиргааны 7 ажилтан, орон нутгийн 12 иргэн, нийт 64 хүн ажиллаж, түймрийг энэ сарын 05-ны өдөр цурманд оруулсан.

Булган аймгийн Хутаг-Өндөр сумын Хантай багийн “Тасархай нугын Сагалдраг” гэдэг газар /05.27/ гарсан түймрийг тус аймгийн Онцгой байдлын газрын 20 албан хаагч, орон нутгийн 51 иргэн, нийт 71 хүн ажиллаж, энэ сарын 7-ны 18:45 цагт бүрэн унтрааж орон нутагт хүлээлгэн өгчээ.

Цаг агаар халж, хур тунадас бага, хуурайшилтын зэрэглэл өндөр байгаа энэ үед иргэд та бүхэн амралт, аялал зугаалгаар явахдаа, ногоон бүсэд зорчихдоо ил задгай гал түлэхгүй  байх, асаасан гал, шүдэнз, тамхины галыг бүрэн унтраах, халуун үнс нурамыг ил задгай асгахгүй байж ой, хээрийн түймрээс урьдчилан сэргийлэхийг Онцгой байдлын ерөнхий газраас анхааруулж байна.

Бусдад түгээх
  • gplus