Ерөнхий сайд ОХУ явахын өмнө Засгийн газрын гишүүн Ж.Батсуурийг ажилдаа хариуцлагагүй хандсан гэдэн үндэслэлээр огцруулах саналаа УИХ-д хүргүүлсэн. УИХ-ын лхагва гарагийн хуралдаанаараа БСШУС-ын сайд Ж.Батсуурийг огцруулах асуудлыг хэлэлцэн, гишүүдийн 64.3 хувийн саналаар түүнийг Засгийн газрын гишүүнээс чөлөөлсөн юм. Монгол Улсад анх удаа шалгалтын тест задарч, дахин шалгалт өгөх үзэгдэл гарсан нь энэ юм. Ийм учраас Ерөнхий сайд бүрэн эрхийнхээ хүрээнд БСШУС-ын сайдад хариуцлага тооцов. Мөн дараагийн шат шатны хүмүүст хариуцлага тооцно гэдгийг ч албаныхан дуулгаад байгаа.
Салбарын сайд бол тухайн салбарын ажил, үйл ажиллагааны хэрэгжилтийг Ерөнхий сайд болон улсын хэмжээнд дангаараа бүрэн хариуцах үүрэгтэй. Салбарын яамаа удирдаж чаддаггүй сайд нар ч үүрэгт ажлаа хүлээлгэн өгөх, түүнтэй хариуцлага тооцох асуудал Ерөнхий сайдын бүрэн эрх. Тэгвэл эх сурвалжуудын мэдээлж байгаагаар Ж.Батсуурийг огцруулах асуудалтай хамт Эрүүл мэндийн сайд А.Цогцэцэгийг огцруулах асуудал орж ирсэн гэнэ. Гэхдээ түүнийг огцруулах асуудал УИХ-д очсонгүй. Тэр мултарч үлдлээ. Нэг үгээр А.Цогцэцэг сайд Ерөнхий сайдын хараанд өртчихөөд байгаа гэсэн үг.
Харин нийгмийн сүлжээнд дараагийн огцрох ёстой хүнээр Батлан хамгаалахын сайд Б.Бат-Эрдэнийг нэрлэж байна. Цэргийн хээрийн сургуулилтын үеэр дайсан руугаа шиддэг гранатаа өөр дээрээ алдаж, алтан амиараа хохирсон асуудал өнөөдөр намжмал байдал орсон. Дэлбэрэлтийн улмаас хоёр сайхан залуу алтан амиа алдаж, найман хүн хүнд шархадсан харамсалтай осол мартагдаж байна. Хуультай, журамтай, дэгтэй, цэрэгтэй улс оронд бол Батлан хамгаалахын сайд нь өнөөдөр огцорч байгаа. Гэвч тэгсэнгүй. Б.Бат-Эрдэнэ сайд “Батлан хамгаалахын сайдад цэргийн сахилга бат, цэргийн сургалтын талаар ямар ч эрхгүй. Монгол Улсын ерөнхийлөгч бөгөөд Зэвсэгт хүчний ерөнхий командлагч, ЗХЖШтабын дарга, төрлийн цэргийн командлагч нарт цэргийн мэргэжлийн удирдлага, сургалт, сахилга, хариуцлагын талаарх эрх, үүргийг олгосон” гэх хуулийн заалтаар өмгөөлүүлэн үлдэж байх шиг.
Ингэснээр албан тушаал, амбиц ихтэй, хуульгүй манай улсад Батлан хамгаалахын сайд нь огцрох байтугай буруу нь бусдынх болоод л өнгөрч байна. Уг нь Батлан хамгаалахын салбарын үйл ажиллагаа доголдсоноос болж тус салбарт ажиллаж байгаа хүмүүс эрүүл мэндээрээ хохирч байна. Иймээс Б.Бат-Эрдэнэ сайд Ж.Батсуурь сайдын нэгэн адил салбарын яамаа удирдаж чадаагүй учир огцрох ёстой.
П.ГОО
Оллоо.мн