МАХН-ын дэргэдэх Ардчилал шударга ёс эмэгтэйчүүдийн холбооноос оффшорчдын эсрэг тууштай тэмцэхээ илэрхийлж тайлбар, мэдэгдэл хийлээ. Жилээс жилд Монгол Улсын авлигын индекс өссөөр байгаа. Иймээс монголчууд оффшорчдын эсрэг шударгаар тууштай тэмцэх цаг болсон гэдгээ мэдээллийн эхэнд онцоллоо.
Энэ талаар Ардчилал шударга ёс эмэгтэйчүүдийн холбооны Ерөнхий нарийн бичгийн дарга Ш.Булган “Анх 2013 он Монгол Улсын өндөр албан тушаалтан С.Баярцогт их хэмжээний мөнгийг оффшор бүсэд нуусан талаар мэдээлэл олон нийтэд хүрсэн. Үүний дараа ард түмнээс хулгайлж, татвараас нуун, улс дамжин мөнгөө угааж, авлигын ноцтой хүнд хэргээ нуун дарагдуулсан 49 хүн хамааралтай 17 тэрбум ам.доллар байгаа тухай мэдээлэл задарсан. Гэвч АТГ, прокурорын байгууллага болон Хууль зүйн яам ямар ч доривтой ажил хийхгүй байна. Иймээс МАХН оффшор бүсэд байгаа хөрөнгийг буцааж авчрахын тулд тууштай тэмцэнэ. Энэ чухал ажлыг санаачлан олон улсын хуулийн хүрээнд хийхээр ажиллаж байна” гэлээ.
Мөн тэд оффшор бүс дэх хууль бус хөрөнгийг буцааж авахын төлөө олон улсын хуулийн хүрээнд тусгайлан хууль санаачилж УИХ-д өргөн барьж, батлуулахын төлөө тэмцэнэ. Иймээс энэ тэмцэл нэгдэх хүсэлтэй улстөрч, төрийн албан хаагч, хуульч нарыг хамтран ажиллахыг уриалсан юм. Түүнчлэн АТГ болон прокурорын байгууллагын улс төрийн нөлөөллөөс гаргаж үйл ажиллагаанд нь хяналт тавих ажлыг эхлүүлнэ гэдгээ мэдэгдлээ.
П.Гоо
olloo.mn