“Сентерра гоулд” компанийн тусгай зөвшөөрлүүдийг хүчингүй болгох хүсэлтийг байгаль орчны төлөөх иргэний нийгмийн байгууллагын төлөөллүүд шүүхэд гаргасан. Тэгвэл уг шүүх хурал өчигдөр Захиргааны хэргийн шүүхэд боллоо. Өмнө нь хэд хэдэн удаа хэлэлцэхээр товлосон ч тодорхой шалтгааны улмаас хойшлоод байсан уг шүүх хурлын шийдвэрээр “Сентерра гоулд” компанийн тусгай зөвшөөрлийг түдгэлзүүлэх шийдвэр гаргалаа.
 
Шүүх хуралд нэхэмжлэгч талын төлөөлөл болж Ноён уул аваръя” хөдөлгөөны тэргүүн О.Цэрэннадмид,  УИХ-ын гишүүн Х.Болорчулуун, Босоо хөх Монгол хөдөлгөөний тэргүүн П.Шинжээравдан, өмгөөлөгч Г.Батбаяр нар оролцсон. Хариуцагчаар Ашигт малтмалын газар, гуравдагч этгээдээр Монгол улсын Засгийн  газар, “Сентерра гоулд” ХХК-ийн төлөөлөл оролцов.

Захиргааны хэрэг шүүхэд хянан шийдвэрлэх тухай хуулийн 61.1-д зааснаар хэрэг маргааныг эцэслэн шийдэгдэх хүртэл лиценз бүхий дөрвөн талбайд уул уурхайн олборлолт, ашиглалтын үйл ажиллагаа явуулахыг  зогсоох тухай шүүгчийн тогтоол гарсан байна. Тэгвэл “Сентерра гоулд” ХХК-ийн зүгээс шүүхийн шийдвэрийг эсэргүүцэж,  дараагийн шатны шүүхэд хандахаа мэдэгдлээ. 

Сэлэнгэ аймгийн Мандал суманд Ноён уул хүдрийн 27 667 378 тонн, алтны 75 942,11 тонн нөөцтэй нь тогтоогдсон байдаг. Энэ баялгийн 66 хувийг “Сентерра Гоулд” ХХК, 34 хувийг төр эзэмшихээр болсон. Ашиглалтын дөрвөн лиценз нь “Сентерра Гоулд” ХХК-д байдаг. Тиймээс уг лицензүүдийг хүчингүй болгож өгнө үү хэмээн “Ноён уулаа аваръя” ТББ Нийслэлийн захиргааны хэргийн шүүхэд хандсан байна.