Сунгаанд гарах улстөрчид бэлэн ч шигших арга тодорхойгүй

Ерөнхийлөгчийн сонгуульд өрсөлдөх кандидат нь Ардын намд даанч тодорхой төдийгүй сонгуулийн сурталчилгааг ч албан бусаар эхлүүллээ. ОУВС-гийн хамгийн хүнд нөхцөлтэй хөтөлбөрт хамрагдах болсонтой холбогдуулан нийгэмд үүссэн сөрөг сэтгэгдлийг арилгахаар Ерөнхий сайд хичээж байна, орон нутгаар тойрч энэ үүргээ биелүүлж буй гэж харагдана. Харин Ардчилсан намд байдал тодорхойгүй хэвээр.
 
Ерөнхийлөгчид нэр дэвшин өрсөлдөхөөр энэ намаас Монгол Улсын баатар нэг, Ерөнхий сайд асан хоёр, Монгол Улсын сайд, парламентын гишүүн асангууд гурав, ардчиллынхан өнгөрсөн зун хуйгаараа сонгуульд бүдрэхэд босоо үлдэж одоогийн парламентад сонгогдсон УИХ-ын гишүүн нэг, нийт долоон хүчтэй улстөрч нам доторх сунгаанд өрсөлдөхөд бэлэн байгаа аж.
 
Гэвч уяан дээр багталцаж ядан амаа аван дүүхэлзсэн морьд шиг, шүүгчийн буун дуунаар гараанаас гарах гэж байгаа гүйлтийн тамирчид шиг Ерөнхийлөгчийн сонгуульд нэр дэвшихээр шийдсэн энэ олон өрсөлдөгчдөө дундаас нь хэрхэн яаж шигшиж, шалгаруулж гаргах нь туйлын бүрхэг байна.
 
Уг нь Ардчилсан намд шинэчлэлийн алхмууд эхэлж, анх удаа намын даргаа бүх гишүүдийнхээ дундаас сонголоо. Тэглээ гээд намын дарга нь Ерөнхийлөгчийн сонгуульд дуртай хүнээ зүтгүүлсэнгүй, өөрөө яаж сонгогдсон тэр л зарчмаар гишүүдийнхээ санал хураалтаар ирэх сонгуульд намаа төлөөлөх кандидатаа шалгаруулна гэлээ. Одоо ч гэсэн улс төрд шинэ үзэгдэл болж Үндэсний Бодлогын хороо буюу хуучнаар ҮЗХ-ныхоо гишүүдийг нийт гишүүдийнхээ санал хураалтаар сонгох гэж байна.
 
Хэдийгээр зарчим, санаа нь зөв ч цаг хугацаа тулчихсан, Дээд шүүхээс шинэ дүрмийг нь бүртгээгүйгээс ойлгомжгүй байдал үүсчихсэн тул асуудал бүрхэг болов. Ерөнхийлөгчид нэр дэвшүүлэх ажиллагааг санал авах өдрөөс 55 хоногийн өмнө эхлүүлж 5 хоногийн хугацаанд дуусгана гэж Сонгуулийн тухай хуулийн 139 дүгээр зүйлийн 139.2 дахь хэсэгт заажээ. Санал авах өдөр нь зургадугаар сарын 26 гэж товлосон учир ирэх тавдугаар сарын 02-06-ныг дуустал хугацаанд намууд нэр дэвшигчээ СЕХ-нд бүртгүүлж олон нийтэд зарлах ёстой.
 
Тэгэхээр Ардчилсан намд Үндэсний Бодлогын хорооныхоо гишүүдийг сонгуулиар сонгож, батлаад дараа нь Ерөнхийлөгчийн сонгуульд нэр дэвшигчээ нам доторх сунгаагаар шалгаруулан төрийн тэргүүний төлөөх сонгуульд бултаараа ханцуй шамлан орж явчихад cap гарангийн хугацаа л үлдээд байна.
 
Гэтэл Үндэсний бодлогын хорооны гишүүдийг сонгох гэтэл Дээд шүүх дүрмийг нь батлалгүй буцаачихсан, басхүү намын дарга С.Эрдэнэ хуучны ҮЗХ татан буугдсан, байхгүй гээд зарлачихсан байдаг. Шинэ дүрмэнд тусгагдсан дотоод бүтцийн байгууллагаа хуучин дүрмээр яаж байгуулах нь тодорхойгүй, Ерөнхийлөгчийн сонгуульд өрсөлдөх гээд дор бүрнээ нэрээ дэвшүүлчихээд уралдааныхаа гараан дээр багталцахгүй шахам эгнэчихээд байгаа “тамирчид”-даа С.Эрдэнэ дарга нь ямар байдлаар дохио өгч гараанаас гаргах нь ойлгомжгүй.
 
Нөгөө талд өрсөлдөгчөө хоёр сонгууль дараалан далаар нь тавьж, засгийн эрхийг атгаж байгаа нам хэдийнэ гараанаас гарчихсан нэжигнүүлж байна. Эрх баригчид руу чиглэсэн сөрөг мессеж, сэтгэгдэл бүрийг залруулах кампанит ажлыг орон даяар ид өрнүүлж байна. Мэргэжлийн гэж байгаад “субботникийн” болсон Засгийн газрын ажил нь төдийлөн хурдгүй, олон нийтэд багагүй чичлүүлж буй ч бас ч гэж ямар нэг байдлаар ажил хийж байгаа тул нийгмийн сэтгэлзүй дээр тоглох олон янзын хөзөр атгаастай.
 
Харин Дээд шүүхийн бүртгэлийн асуудлаас үүдээд яах нь ойлгомжгүй байгаа Ардчилсан намын хувьд цаг хугацаа Ч.Сайханбилэгийн хэлдгээр ёстой л хайчилчих гээд л байна.
 
АН-ын 120 мянга гаруй гишүүнээс өрсөлдөөнөөр шалгарч намын дарга болоод удаагүй байгаа С.Эрдэнэ ч Монголын хоёр дахь том намын удирдагчийн үүрэг хариуцлагаа умартсан уу гэлтэй айсуй сонгуульд манай нам ялагдвал би огцрохгүй гэж хаяагаа манасан.
 
100 гаруй мянган хүний итгэл хүлээж анхныхаа улс төрийн том тулаанд орох гэж буй жанжин нь атал нэр дэвшигчээ ч тодруулаагүй мөртлөө цагаан тугаа өргөх гээд байгаа нь хачин жигтэй. Тиймээс Монголын улс төрийн нөлөө бүхий намын өмнө хүлээсэн үүрэг хариуцлагаа ухамсарлаж дотоод сонгуулийнхаа үйл явцаас хамааран сунгааныхаа дүрэм журам, цаг хугацааг яаралтай тодорхой болгохыг улс төрийн нөхцөл байдал С.Эрдэнэ даргад тулгаж байна!

Өглөөний сонин

Бусдад түгээх
  • gplus

Сэтгэгдэл үлдээх

Уншигчдын бичсэн сэтгэгдэлд olloo.mn хариуцлага хүлээхгүй болно.
ХХЗХ-ны журмын дагуу зvй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зvйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 772-01100 утсаар хүлээн авна.

Сэтгэгдэлээ бичихХураах

тэмдэгтэнд багтааж бичнэ үү.
  • Бизьяа 2017-03-24 14:21:26
    Баасны чинь АН. Ардчилалын нэр барьж хулгай хийгсэд л байдгийг мартаж болохгүй.
  • Гээгээ 2017-03-24 06:40:18
    Б.Болдыг дэмжиж байна. Ерөнхийлөгчийг соёлтой, боловсролтой, чиг шулуун, ард түмнийхээ төлөө гэсэн чинхүү сэтгэлтэй хүнд Болд орно. Элдэв шахалтанд орогүй.
  • Zochin 2017-03-24 06:17:15
    AN icheechee. Negee l olon jil suugaad kheruulees eer khiisen zuil uy ch baikhgyi AMARJARGAL, BATKHUU, ...
  • irgen 2017-03-24 06:05:18
    Амагжаргал нэр цэвэр дээ алтанхуяг эсвэл ман аас гаргаж болохгүй хяналтгүй нөгөө талаас ерэнхийлэгч байх нь зөвөө
  • kkk 2017-03-24 04:02:46
    Xoe setguulch ee AN nam chamd yamar xamaatai yum be? MAN iinxaa tuxai bicheech! zaxialgat setguulch guai...
  • Amarjargal  2017-03-24 02:20:19
    Amarjargal medlegeer zodoj baij neg youm eronhiilpgch boloh niguurtai gebch Nyamkatai taarbal barahgiu. busdiig no bol buland saihan shahaj baigaad nam tabina.
  • !!! 2017-03-24 02:08:30
    Bathui l bish bol busad ni dewshij bolhoor l ulsuud haragdaj b na !!