Сүүлийн үед  62500 төгрөгөөр элсэж ороод  зүгээр сууж байгаад дөрөв хоногийн дараа 187000  төгрөг  эргүүлэн авдаг гэх нэгэн төрлийн  сүлжээний бизнес ид эрчээ авч байна. Гурван найз хүүхний хоёр нь элсэж орсон байгаа нь энэ сүлжээний бизнес ямар хурдтай явааг харуулж байгаа юм.

“Зүгээр сууж байхад л дансанд чинь мөнгө орсоор байх болно. Ажлынхаа хажуугаар их мөнгө олж болох алтан боломжийг битгий алдаарай”. Ийм сурталчилгаанд багахан ч болов эргэлзэлгүйгээр шууд хааж орхидог хүн ер нь цөөхөн болов уу. Дороо хүн элсүүлж, сүлжээ үүсгэдэг пирамид луйврууд бүгд бялуу шиг амттай дээрх үгээр эхэлдэг. Гэвч төд удалгүй иргэд оруулсан мөнгөө алдаж,  цагдаагийн байгууллагад гомдол гаргаж эхэлдэг.
 
Тэгвэл сүүлийн үед эрчээ э аваад байгаа 62500 төгрөгөөр элсдэг энэхүү сүлжээнээс хохирсон иргэд гомдол гаргаж эхэлсэн байна. Тодруулбал одоогийн байдлаар энэ асуудлаар хохирсон хүмүүсийн тоо 300 хол давж, нийтдээ 70 гаруй сая төгрөгийн хохирол амсаад байгаа гэдгийг цагдаагийнхан мэдээлээд байна. Иймд цаашид сүлжээний энэ бизнест хууртахгүй байхыг анхаарууллаа.